NRK Meny
Normal

Sogndal-trenaren: «Nei, vi skal ikkje hente nye spelarar før seriestart»

Med Rune Bolseth og Erik Dahlin som dei einaste forsterkingane, er Jonas Olsson nøgd med Sogndal-stallen framfor den kommande sesongen.

Sogndal-trenar Jonas Olsson
Foto: Arve Uglum (MMS-foto) / NRK

– Dersom ingen spelarar forsvinn, kjem vi ikkje til å hente nokon nye. Då må vi avvente og sjå kva som eventuelt skjer i sommarvindauget, seier Jonas Olsson til NRK.no.

Held utkik for å vere i forkant

Sogndal var torsdag samla til den første treninga framfor seriestarten til våren. Samstundes er også overgangsvindauget ope – og mange klubbar er på jakt etter forsterkingar.

Men det er ikkje Sogndal...

– Vi held utkik over marknaden, og det gjeld alle posisjonar. På den måten er vi i forkant, dersom nokon skulle bli skadde eller selde. Men slik det ser ut no, så er vi nøgde med den troppen vi har, seier Sogndal-trenaren.

– Så du vil møte eliteserien 2013 med den troppen du har?

– Ja, understrekar Olsson.

Meiner Sogndal er sterkare – trass avgangar

Sidan sesongslutt sist haust har Sogndal fått inn svenske Erik Dahlin som erstattar i mål for Kenneth Udjus. Rune Bolseth er også klar for comeback for gamleklubben.

Olsson meiner klubben med det er godt skodd framfor seriestart, trass i at spelarar som Henrik Furebotn, Eirik Bakke og Azar Karadas er borte frå fjoråret – i tillegg til Udjus.

– Vi får inn to dyktige spelarar med Bolseth og Dahlin. Men først og fremst får vi behalde mange gode – og både Gustav Valsvik og Badji har blitt verande. Så eg meiner vi står sterkare no enn ved seriestart i fjor, seier trenaren.

Han legg til:

– Dessutan har vi von om at nokre av dei yngre spelarane skal ta steget.

Oppteken av å vere fylkeslag

Ein av dei som er borte frå spelarstallen er Eirik Bakke, som etter ei lang og innhaldsrik karriere valde å leggje opp i haust.

No held den tidlegare englandsproffen oversikt over spelarmarknaden.

– Om spelarar skulle forsvinne, så har vi oversikt. Men det er også viktig for oss å vere eit fylkeslag, og det må vi halde fram med å vere.

– Siste kampen i haust starta vi med sju spelarar frå fylket, seier Olsson.

Den nye regjeringa vurderer å kvitte seg med odelslova. Det kjem ikkje på tale, svarer bøndene.
Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.