– Ein av rovviltkontaktane våre har vore inne i fjellområda mellom Lærdal og Årdal og sett på fem kadaver. Alt tyder på at det er jerv som har teke dei sauene, seier rovviltansvarleg i Sogn og Fjordane, Rein Arne Golf.
Dei fem kadavera er funne vest i fjella mellom Lærdal og Årdal, rundt Blåsaren og Storvatnet.
Spor på kadavera tyder på at det er ei stund sidan jerven var på ferde.
– Kadavera er ikkje heilt ferske, seier Golf.
- LES OGSÅ:
- LES OGSÅ:
Var nedgravne i myr og vatn
Kadavera har typiske teikn for jerveåtak.
– Det som er typisk for jerven er nakkebitet med kraftige knusingar i nakkevirvlane. Det er det som gjer at vi klarar å skilje jerven som skadejeger frå andre årsaker, seier Golf.
Han fortel at kadavera var delvis nedgravne i myr og vatn.
– Det er også eit typisk teikn på at det er jerven som har gjort det, seier Golf.
Dei fem kadavera er funne i eit avgrensa område, og det er grunn til å tru at det er same jerv som har vore på ferde.
– Vi ber dei som har sau i området om å sjekke sauene sine. Jerven vil gå over heile fjellområdet på ein dag, så det kan vere kadaver andre stadar i fjellet som ikkje er funne ennå, seier Golf.
- LES OGSÅ:
Kan vere over alle haugar
Naddvik beitelag har søkt om skadefellingsløyve, men Golf trur det kan verte krevjande å finne jerven.
– Nei, sidan det ikkje er heilt ferskt, kan jerven vere over alle haugar, seier Golf.
Han peikar på at jerven flyttar seg raskt over svært store område.
– Han kan trekkje austover til Oppland att, eller nordover eller innover mot Luster. Også sørover kan han ta vegen, seier Golf.
Til no i år er det teke ut to jerv på ekstraordinært uttak, i tillegg til at ein jerv er registrert som trafikkdrepen.
- LES OGSÅ:
Turgåar fann lam i elv
Leiar i Naddvik beitelag, Ole Bjarne Hovland, stadfestar at beitelaget er i full sving etter at meldinga om jervedrepne lam kom.
– Vi fekk melding søndag frå ein turgåar som hadde funne eit lam som låg i ei elv. Dette vart sjekka ut av gjetarane våre tysdag og dei fann fleire lam. Vi ante ugler i mosen og kontakta rovviltkonsulenten. Han har vore inne og sjekka det ut, og stadfestar at det er jerv som har vore på ferde, seier leiar i Naddvik beitelag, Ole Bjarne Hovland.
Onsdag kveld er ein i full gang med å få fellingslaget i gang.
– Vi må også få informert alle saueeigarane og få folk ut i terrenget for å eventuelt finne fleire kadaver og spor etter jerven, seier Hovland.
Kadavera er funne i Naddvik beitelag sitt beiteområde som ligg litt inn i dalen som går inn frå Naddvik i Årdal.
– Det er i Blåsarbåten-området, seier Hovland.
- LES OGSÅ:
- LES OGSÅ:
Hadde store tap i 2007
Dei siste sauene er akkurat sleppte ut, og totalt går det om lag 800 sauer som beitar i området.
– Det går også sauer frå Lærdalsområdet som beitar inn mot området frå andre sida, seier Hovland.
Sauebøndene i området har også tidlegare vore plaga med jerv i området.
– Vi har fleire gonger tidlegare opplevd store tap. Spesielt i 2007 då det var ei yngling i området. No fryktar vi det verste, seier Hovland.
Det er fleire år sidan det vart teke ut jerv i området.
– Vi hadde ein god del jerveskade i 2011, og vi har hatt ein god del meir tap enn andre stadar i indre Sogn, så vi har vore usikre om det har vore jerv her hjå oss. Men vi har ikkje hatt noko sikkert å gå etter, seier Hovland.
- LES OGSÅ:
- LES OGSÅ:
Håpar å ha løyvet i morgontimane
Beitelaget har onsdag ettermiddag sendt søknad om skadefellingsløyve.
– Vi ventar på svar, men vi reknar med at løyvet kjem ganske raskt torsdag morgon. Vi sender inn jegerar i området i kveld for å vere klar, seier Hovland.
Han legg til at sjansen for at ein får ei felling på løyvet er liten, for jerven er ein vanskeleg kar å få has på.
– Men vi får iallfall folk inn i området og får avdekt kor stort skadeomfanget er, seier Hovland.
Han legg ikkje skjul på at det er ein tung situasjon.
– Det er forferdeleg trist. Vi har nett fått ut dyra våre, dei siste vart køyrde opp måndag. Og så skjer dette no som vi har hatt litt lite uttak i vinter. Det er iallfall fire jervar i Sogn som ikkje vart tekne ut i vår. Det er trist i eit område der det ikkje skal vere jerv. Vi er veldig frustrerte, seier Hovland.
- LES OGSÅ: