Kommunen har søkt om statusen for perioden 1. mai til 30. september.
– Det inneber at dei kan få halde butikkane opne på søndagar og andre heilagdagar, seier Gunnar O. Hæreid hos Fylkesmannen.
– Har eit sterkt merkenamn
Balestrand har ikkje tidlegare søkt om statusen, men Fylkesmannen var ikkje i tvil om at den skulle innvilgast.
– Vi har funne det godt dokumentert at det er mange turistar i Balestrand på den tida. Dei handlar der og dei bur der på dei ulike hotella og andre overnattingsstadar. I tillegg har vi lagt vekt på at Balestrand har eit sterkt merkenamn som turiststad, seier Hæreid.
Meiner det vil bety mykje
Næringssjef i Balestrand kommune, Johannes Sjøtun, seier dette er ei understreking av statusen deira som turistplass.
– Eg reknar med at næringslivet ser positivt på dette. Det står att å sjå kor mykje dette vil bety for inntektene. Litt vil det nok bety, og det vil nok bety ein del for profilen til Balestrand å kunne ha denne moglegheita, seier han.
Butikkane får sjølv bestemme om dei vil bruke moglegheita til å ha søndagsope i perioden, og i kva utstrekning dei vil nytte den.