Har fått fornya håp om å få stoppa sjødeponiet i Førdefjorden

– Vi ventar at Venstre jobbar på internt i regjeringa for å få stogga forureiningsskandalen i Førdefjorden. Det er framleis mogleg å stogge det, det er lenge til prosjektet er realisert, seier leiar Gaute Eiterjord.

Han vart positivt overraska over gjennomslaget Venstre har fått for sin miljøpolitikk i den regjeringsplattforma til Høgre, Frp og Venstre. Der står det mellom anna at det ikkje vil bli gitt nye løyve til sjødeponi for gruveavfall i den neste perioden. Regjeringa vil også greie ut konsekvensane av eit forbod mot nye sjødeponi.

– Vi skulle ønskje at det stod i regjeringserklæringa at gruvedumpinga i Førdefjorden ikkje skal skje. Men når det står at ein ikkje skal ha nye deponi og at dei vil greie ut eit forbod mot dumping, så er det eit tydeleg signal om at dette er ein gamaldags måte å ta hand om avfallet sitt på, seier Eiterjord.

• Les også: Erna Solberg: Her er den blågrønne regjeringens plattform

Nordic Mining er ikkje uroa

Nordic Mining ønskjer å vinne ut mineralet rutil i Engebøfjellet i Naustdal. Planen er å deponere overskotsmasse frå gruvedrifta i eit fjorddeponi i Førdefjorden.

Natur og Ungdom er blant dei som har stått høgst på barrikadane i kampen for å få stoppa planen om deponiet. For to år sidan lenka ungdomane seg til Nordic Mining sine maskiner på Engebøfjellet, og har sidan betalt nærare ein million kroner i bøter for oppførselen.

• Les også: Dette er verdien på Engebøfjellet
• Les også: Fjorddeponiet kan bli mindre enn venta

No har Eiterjord fått nytt håp.

– Det er enno mogleg å stoppe prosjektet. Nordic Mining har ikkje søkt om driftskonsesjon, og Venstre kan i regjeringa vere med å stogge den.

Administrerande direktør Ivar Fossum i Nordic Mining ser ingen grunn til uro, trass føringane som blir lagt for framtidige sjødeponi i regjeringsplattforma.

– Eg kan ikkje tenkje meg at dette har noko å seie for løyva vi har fått. Dei har blitt vurdert gjentekne gonger av ulike styresmakter og forvaltningsorgan gjennom veldig mange år, seier Fossum til NRK søndag kveld.

• Les også: Ber klima- og miljøministeren gjere ny vurdering av gruveplanane i Vevring

– Eg håpar vi kan berge Førdefjorden også

Fylkesleiar i Sogn og Fjordane Venstre, Gunhild Berge Stang, er svært glad for at dei har fått gjennomslag for å seie nei til nye utsleppsløyve til sjødeponi.

– Det er vanskeleg å seie på ståande fot. I utgangspunktet skal det ikkje ha tilbakeverkande kraft. Men så er det dette med om føresetnadane er haldne, og det er løyver som framleis ikkje er gitt. Det må vi sjå på, seier ho og legg til.

– I eit nasjonalt perspektiv er det viktig at Førdefjorden-saka ikkje gir presedens for korleis vi skal bruke fjordane. I verste fall går prosjektet inn som eit monument for ein avslutta praksis. Men eg håpar vi kan klare å berge Førdefjorden også.

– Dei har tolka det i ei retning dei ønskjer

Det seier stortingsrepresentant Frida Melvær i Høgre. Ho har vore i Moss søndag og har snakka med den politiske leiinga i Høgre om akkurat dette punktet i regjeringsplattforma.

– Det blir ikkje gitt utsleppsløyve til nye sjødeponi i perioden fram til 2021. Men dette får ingen konsekvensar for løyva som er gitt, blant anna i Førdefjorden. Dei ligg fast, seier ho til NRK søndag kveld.

Høgre-politikaren ser ingen grunn til at Natur og Ungdom no skal få fornya håp til å stoppe deponiet i Førdefjorden.

– Dei har nok tolka dette i ei retning dei ønskjer. Løyvet som er gitt i Førdefjorden og Nordic Mining sitt arbeid blir ikkje råka av desse setningane i regjeringsplattforma.

Ho har ikkje sansen for at det frå Venstre si side blir gitt signal om at deponeringa i Førde kan bli stoppa.

– Det er feil tolking, seier Melvær.