For åttande året på rad arrangerer tredje klasse ved medielinja ved Firda vidaregåande skule festival.
Også i år er det høve for unge filmskaparar å vise fram filmane sine.
Publikumspris
Konkurransen skjer i samarbeid med NRK. Filmane vil verte presenterte på NRK Sogn og Fjordane sine nettsider der alle kan stemme på den som skal få publikumsprisen. I tillegg vil ein jury kåre vinnarar av andre kategoriar.
Fristen for å sende inn filmane er 30. oktober og du kan lese meir om konkurransen på .
I fjor var det 18-åringane Erlend Eide og Pål Djupegot frå Sandane som vann publikumsprisen. Dei vann også prisen for beste komedie.
Skrekk og gru
I år handlar det om skrekk når festivalen på Sandane blir arrangert 16. - 20. november. Og det blir viste eit breitt spekter av filmar innan denne sjangeren. Mellom filmane som alt er på plass er "Antichrist" og "Snarveien".
- Men det er viktig å presisere at dei innsendte kortfilmane ikkje treng å vere skrekkfilmar. Vi er interesserte i alle slags sjangrar, seier festivalsjef Thomas H. Hovlandsvåg.
- Eit flott tilbod
Han seier at Q-film er eit flott kulturtilbod for ungdom i fylket.
- Dei får oppleve filmvisningar på både tradisjonelle og utradisjonelle måtar, samt å få moglegheit til å uttrykke seg kreativt gjennom film.
Festivalen vert avslutta med den årlege Q-prisfesten, der dei beste av kortfilmane frå unge filmskaparar får velfortente prisar.
