Han fryktar studentane i fylket står att som taparar

– For studentane sin del er ikkje dette bra. Vi kjem til å miste mykje påverknad og representasjonen i styret til samskipnaden, seier Almås Anfinset som er leiar for studentparlamentet ved Høgskulen i Sogn og Fjordane.

Med knappast mogleg fleirtal sa høgskulestyret i Sogn og Fjordane 9. juni ja til å gå inn i Høgskulen på Vestlandet, saman med høgskulane i Bergen og Stord/Haugesund.

På måndag kan Studentsamskipnaden i Sogn og Fjordane og Studentsamskipnaden i Bergen avgjere om dei skal slå seg saman. Då ventar eit møte med kunnskapsdepartementet. Studentane ved HiSF har i dag fleirtal i styret til studentsamskipnaden, men fryktar dei mister innflytelse ved ein fusjon med Bergen.

– Det beste vi kan håpe på med denne fusjonen er å få ein fast representant i SIB-styret på deling med Høgskulen Stord Haugesund. Denne studenten blir aleine om å føre regionspolitikk. Det kan på ingen måte måle seg med dagens løysing, seier Almås Anfinset.

• Les også: Dei er sterkt bekymra for samskipnad-fusjon
• Les også: I dag held han krisemøte for å berga fusjonen

Har sagt nei til avtale

Til møtet på måndag går studentsamskipnaden inn utan ei avtale. Avtala fann dei ikkje god nok.

– Studentsamskipnaden sitt styre har sagt nei til avtalen som har vore forhandla fram. Dei ønskjer å få ein best mogleg avtale for studentvelferden. Per i dag i vurderar dei avtalen som ikkje god nok, seier rektor ved Høgskulen i Sogn og Fjordane, Rasmus Stokke.

Han har full forståing for frykta til studentparlamentet.

– Vi må ha respekt for at studentane føle ei uvisse. Difor må vi få til ei avtale som er så god som mogleg, seier Stokke.

• Les også: No går han for samanslåing

– Vi har det veldig bra sånn som det allereie er

Almås Anfinset meiner ein fusjon vil svekke studentvelferden.

– Vi har det veldig bra sånn som det allereie er. Då blir det dumt å gje frå seg si eiga stemme, seier Almås Anfinset.

Særleg avstanden til Hordaland og den store forskjellen i tal på studentar skapar problem, meiner Almås Anfinset.

– Vi ligg fire timar vekke frå Bergen, og påverknad frå vår region vil bli dårlegare. Studentsamskipnaden i Bergen har 30 000 studentar, medan vi har 3700 ifrå Høgskulen i Sogn og Fjordane. Då vil vi få veldig lite gjennomslag.

• Les også: Slik blir den nye Vestlandshøgskulen

Han ser med spenning på utfallet av møtet på måndag.

– Eg kryssar fingrane, men eg veit det er sterke krefter som går for fusjon, sjåar Almås Anfinset.