Han er ein av verdas mest erfarne fjellførarar

For femte året har den nepalske sherpaen sommarjobb på Nigardsbreen. Mingma Tsiri Sherpa trivst godt her.

– Fordi sommarsesongen i Nepal er monsun-tid går eg her på isbreen, seier han.

– Lang erfaring

På Nigardsbreen har dei hatt førarar frå Nepal gjennom fleire år.

– Det betyr mykje. Mingma og dei andre er nepalske førarane er flinke. Dei har lang erfaring og er svært interesserte i å gjere ein god jobb, seier Steinar Bruheim, dagleg leiar i Jostedalen breførarlag.

• LES OGSÅ: Forsterkar tryggleiken ytterlegare ved Nigardsbreen

Ikkje alle turistane er klar over kva slags breførar dei har med seg, men blir imponerte når dei får høyre det.

– Det har vore ei glede. Då vi snakka med han, kunne vi ikkje tru kva vi såg. Det har vore ei oppleving å bli leia av ein som har gått Everest 19 gonger. Det er rått, seie Samir Mehta frå Singapore.

Like viktig med tryggleik som i Himalaya

Også André Ijsseltin frå Nederland tykkjer det er kjekt med ein så erfaren førar.

– Vi har ein veldig erfaren guide. Det er godt å høyre og veldig trygt for oss, seier han.

Nigardsbreen blir småtteri for Tsiri Sherpa samanlikna med Mount Everest, men tryggleiken er like viktig på norske isbrear som i Himalaya, meiner han.

– Klatresystemet er det same, men det å leie ei gruppe i høgda på Mount Everest er vanskelegare, og tek lenger tid.