Totalt fekk utøvarane frå Sogn og Fjordane med seg 7 gull, 4 sølv og 4 bronse heim frå Ungdomsmeisterskapen i Friidrett i Haugesund i helga.
Ein av dei som spesielt har utmerka seg er Thomas Mardal frå Sandane Turn og IL etter at han tok gull i alle kastøvingane.
– Prestasjonane til Mardal er fantastisk sterke. Spesielt kombinasjonen med fantastiske kastresultat og sølv på 100 meter, seier Narve Heggheim, dagleg leiar i Norsk friidrett Sogn og Fjordane, til NRK.
Mardal representerer Sandane Turn og Idrettslag, og i klassen for gutar 17-år vann han gull i kule, slegge, spyd og diskos i konkurransen som samlar dei beste ungdomsutøvarane frå heile landet i friidrett.
I tillegg vann han lengdehopp og vart nummer to på 100 meter med den sterke tida 11.03. Totalt har han dermed fem gull og ein sølvmedalje frå UM.
Kan nå langt, men må etter kvart velje
Heggheim meiner Mardal kan verte god på internasjonalt nivå.
– Thomas har alt som skal til for å kunne bli ein representasjonsutøvar i internasjonale juniormeisterskap i åra som kjem.
Men om det vert i få øvingar eller i mange, er eit val Mardal vil måtte ta.
– Han har sjølvsagt potensial som mangekjempar, men må etter kvart gjere sine val om han vil spisse ekstra på enkeltøvingar, seier Heggheim til NRK.
Mange gode resultat
Dag to av ungdomsmeisterskapen er no ferdig, og fleire utøvarar frå fylket har gjort gode resultat.
Ingar Hjelle frå Oppstryn IL vann laurdag gull i høgde for G15 med eit hopp på 1,79.
DNS = Starta ikkje
Fo = forsøk
Kval = kvalifisering