I går kveld melde TV2 at 19 personar måtte forlate plattformen i livbåtar og helikopter, på grunn av ein gasslekkasje.
Lekkasjen vart oppdaga litt over klokka 20, og produksjonen vart raskt stengt ned.
– Det er rutine at mannskapet mønstrar ved livbåtane i slike situasjonar. Dei 19 evakuerte er ein del av mannskapet som ikkje treng å vere på plattformen, seier kommunikasjonssjef Liv Jannie Omdal i Engie E&P Norge til NRK.
Frakta til Florø
Dei evakuerte vart sende til eit mottak i Florø. Omdal seier at dei der kan få hjelp til å bearbeide hendinga.
– Det er viktig å ta hand om dei som blei sendt tilbake. Folk kan oppleve det som ubehageleg eller skummelt.
– Ikkje farleg å vere på plattformen no
– Alt fungerer som det skal på plattformen no. Personellet har normalisert situasjonen, seier Omdal til NRK torsdag morgon.
Dei neste dagane skal dei leite etter det som forårsaka lekkasjen. Produksjonen startar ikkje opp igjen før denne er funne.