Lyden av skiheisar og folk med ski på beina kan du berre høyre ved Sogn skisenter på Hafslo, Hornindal skisenter og Sogndal skisenter Hodlekve.
Og med snømanko i størsteparten av fylket kan det gå tid før dei andre sentera opnar.
Førebels er Sogn den beste moglegheita. Dit hadde mellom anna florøværingane Svenn-Roger Sørensen og Frode Torvanger teke turen.
– Det er her det er snø rett og slett, så vi har ikkje noko val. Til vanleg brukar vi som regel reise til skisenteret på Jølster, seier dei to.
Ventar enno på snøen
På skisenteret i Sogndalsdalen har dei hatt ei veldig godt besøkt romjul, og pengane renn inn. Men det har vore lite pengar i kassa hos dei andre sentera som enno ikkje har opna.
Og ein treig sesongstart er dårleg nytt, mange skisenter har gjeld i millionklassen.
– Dette er ikkje noko kjekt i det heile teke, vedgår Robert Engeland om den treige sesongstarten.
Han er dagleg leiar ved Harpefossen skisenter i Eid, der manglar dei enno nokre centimeter med snø for å få opna delar av anlegget.
- LES OGSÅ:
- LES OGSÅ:
(Artikkelen held fram under biletet)
– Gjelda skuldast investeringar
Men kvar dag utan snø betyr ein ny dag utan folk som betalar for å stå på ski. Det er ikkje ein god start på sesongen, spesielt med tanke på at 2013 vart eit dårleg år økonomisk for skisenteret i Nordfjord.
– Det er ikkje noko hemmelegheit at tala for 2013 er raude, så dette er ein dårleg start for 2014.
– Men det er ikkje noko vi kan gjere noko med, anna enn å vere positive, seier Engeland.
Han understrekar at gjelda dei har opparbeidd seg skuldast investeringar som er til det beste for framtida for senteret.
– Det skuldast investeringar som skal gjere oss meir budde på ting som snømangel, og som skal gjere at vi kan ha tilbod heile året, seier han.
- LES OGSÅ:
(Artikkelen held fram under)
Ser likevel positivt på framtida
Ifølgje årsrekneskapen hadde Harpefossen skisenter i Eid 10,6 millionar kroner i gjeld i 2012. Stryn vinterski hadde 6,7 millionar kroner i gjeld, medan Jølster skisenter hadde 9,5 millionar kroner.
Men Doonovan Goosen som er dagleg leiar ved Jølster skisenter ser framover med optimisme.
– Vi hadde ein fantastisk god sesong i fjor, og gjekk faktisk fleire hundre tusen kroner i pluss.
Han seier gjelda i stor grad skuldast avskrivingar på stolheisen.
– Men driftsmessig var det ein god sesong og vi føler vi ligg godt an, seier Goosen.
- LES OGSÅ:
Har trua på god sesong
I Sogndal går kassaapparatet ved Hodlekve skisenter nesten varmt. Mot slutten av månaden skal den nye skiheisen opne.
Dagleg leiar Ola Alsterholm gler seg over travle dagar.
– Det har vore enormt trykk, og det har vore nesten fleire tilreisande enn lokale fleire dagar, seier Alsterholm.
– Korleis blir årets sesong?
– Vi får eit nytt trekk som opnar i slutten av januar, og det ser vi fram til. Det vil opne opp for store nye areal, og allereie har vi godt førehandssal av sesongkort, seier Alsterholm.
- LES OGSÅ: