Då senterleiaren ville gjere noko med veggane i parkeringshuset i Sogndal, tok han kontakt med kunstnar Geir Rauan.
– Eg hadde sett noko av kunsten hans frå før, og spurte om han ikkje ville finne på noko spennande, seier Wilhelm Tangerud.
Resultatet er to motiv på to vegger, eitt av Sogndalsfjøra sett frå Kjørnes Camping, og eitt av Marifjøra.
– Eg angrar ikkje på at eg spurte, seier Tangerud.
Må opp i stillas for å måle
– Det ligg nokre timar med arbeid bak bileta, det skal eg ikkje legge skjul på, seier kunstnar Geir Rauan.
Veggen der han har måla Mariføra er nesten tre meter høg og sju meter brei, og Rauan meiner det står att ein del finplukk. Men dette er arbeid han kosar seg med.
– Det er veldig takknemleg å måle det i nattmodus. Det er gode fjell, gode former å måle etter, seier han.
Vil live opp fleire grå vegger
Senterleiar Wilhelm Tangen, som også er styreleiar i handelsforeininga i Sogndal, er svært nøgd med korleis parkeringshuset har blitt friska opp.
– Eg ville veldig gjerne at det skulle vere lokale motiv frå Sogn, og eg synest at resultatet er flott.
No har han begynt å planlegge kva som skal skje vidare på kunstfronten.
– Vi får sjå kva vi gjer framover, eg har jo fleire grå vegger, seier han.