Gir Ap og Sp skulda for region-skepsis

Stortingskandidat for Høgre Frida Melvær gir retorikken til Senterpartiet og Arbeidarpartiet skuldar for skepsisen som innbyggarane i Sogn og Fjordingar har til eitt Vestlandsfylke.

Frida Melvær

KJEMPAR FOR REGION: Frida Melvær er stortingskandidat for Høgre i Sogn og Fjordane.

Val

– Eg full forståing for at folk har blitt urolege den seinare tida med tanke på den retorikken som Senterpartiet og Arbeidarpartiet fører i denne saka, seier Frida Melvær som er førstekandidaten til Høgre i Sogn og Fjordane.

Blant Høgre-veljarar seier 57 prosent at dei vil ha eit Vestlandsfylke. Det er høgst av alle parti. Men over 40 prosent seier nei.

Totalt seier 64 prosent av dei spurde i ei meiningsmåling nei til eit storfylke med Hordaland.

Har ikkje gitt opp kampen

– Vi skal desentralisere i staden for å sentralisere. Vi må gjere om vedtak som er feil, seier stortingskandidat for Senterpartiet, Liv Signe Navarsete.

Liv Signe Navarsete

KJEMPAR MOT REGION: Liv Signe Navarsete er stortingskandidat for Senterpartiet i Sogn og Fjordane.

Foto: NRK

Navarsete har ikkje gitt opp kampen om å få gjort om på vedtaket om samanslåing, som er fatta både i fylkestinget og Stortinget.

– Kan ikkje Vestlandsfylket vere ei sterk motmakt mot eit enda sterkare Austland og Oslo?

– Viss dette hadde vore heile Vestlandet, frå Møre og Romsdal til og med Rogaland, så kunne vi begynt å snakke, men om Hordaland får ein utkant, som i realiteten Sogn og Fjordane vil bli, så har det null å bety i den samanhengen, seier Navarsete.

Vil samle Vestlandet mot veksande Austland

I Høgre er Melvær sikker på at dersom dei klarar å skape ei haldning om at ei samanslåing mellom Hordaland og Sogn og Fjordane handlar om oss, og ikkje vi og dei, så vil det bli gode prosessar framover.

– Vi får gode synergiar ved ei samanslåing, ikkje minst ved at Vestlandet vert sterkare i møte med eit stadig veksande Austland, seier Melvær.

Ho meiner Arbeidarpartiet vinglar i denne saka.

– Dei er ikkje lenger det styringspartiet dei har hatt tradisjon for å vere. Dei går tilbake på det meste i møte med motstand i staden for å stå fast på dei reformene som er vedtekne i Stortinget

Seier nei

Torbjørn Vereide i studio

KREV NYE OPPGÅVER: Torbjørn Vereide er fylkespolitikar for Arbeidarpartiet i Sogn og Fjordane.

Foto: Erlend Blaalid Oldeide / NRK

Torbjørn Vereide frå Arbeidarpartiet sa tysdag til NRK at Ap vil røyste nei til storfylke dersom saka kjem opp att i Fylkestinget.

– Dersom det ikkje kjem tydlege signal om nye oppgåver og nye funksjonar til Sogn og Fjordane.At det berre er nye kart frå kartverket, så skal svaret vere nei, seier Vereide.