– Eg håpar det blir operasjon så fort som mogleg. Eg byrjar å bli ganske lei, seier Holsæter.
Under kampen mot Viking merka Sogndal-spelaren smerter i hofta etter ei takling. Sidan då har han slite med eitt eller anna som ikkje er som det skal.
Ventar å vere ute av spel i tre-fire månadar
Skaden heldt i fjor Holsæter på sidelinja heilt til han fekk med seg nokre kampar heilt på slutten av sesongen. I vinter har han ikkje fått delteke på treningar med laget slik han vil.
– No er eg klar for å bli kvitt problemet. Om operasjon er einaste utveg, så er eg veldig klar for det. seier kantspelaren.
Holsæter skal på ein endeleg sjekk i slutten av månaden, og då tyder alt på at det endar opp med eit inngrep. I så tilfelle vil han vere ute av spel i tre-fire månadar.
Håpar å vere heilt klar til haustsesongen
Skulle det ende med at 23-åringen må under kniven, betyr det samstundes at heile vårsesongen går i vasken.
– Eg håpar at eg skal vere heilt klar når vi kjem til haustsesongen, seier han.
– Korleis er det å måtte operere no når Sogndal er midt i den viktige oppkøyringa?
– Det er så klart litt demotiverande. Eg skulle helst ha gjort dette i fjor, men det skjedde jo ikkje. No må eg berre tenkje positivt og sjå framover til at eg er klar att.
