NRK Meny
Normal

Går det an å kjøpe julebordsantrekket frå ein bruktbutikk?

FØRDE (NRK): Julebordsesongen er rett rundt hjørnet, og mange vel å kjøpe nye antrekk før festen. Me har testa om ein kan finne antrekket på ein bruktbutikk.

Arianrhod Engebø og Erlend Blaalid Oldeide prøver på seg brukte klede på bruktbutikken

PRØVEKANINAR: NRK-tilsette, Arianrhod Engebø og Erlend Blaalid Oldeide, tok på seg rolla som mannekengar for anledninga.

Foto: Borghild Andersdotter Vevle / NRK

– Det er heilt mogleg å finne julebordsantrekket på ein bruktbutikk, meiner Hanne Schnitler.

Ho driv bruktbutikken Om Att i Førde sentrum og meiner bruktbutikkar har varer for ein kvar smak.

Ein rapport frå Statens institutt for forbruksforsking viser at nordmenn i snitt har 350 plagg i klesskapet.

Då kan ein tenke seg at det burde vere mogleg å kjøpe det nye julebordsantrekket brukt, for å spare miljøet for utsleppa som kjem med kledeforbruk.

Hanne Schnitler på bruktbutikken Om att

BUTIKKEIGAR: Hanne Schnitler har trua på brukte julebordantrekk.

Foto: Arianrhod Engebø / NRK

90-talet møter western

To av NRK Sogn og Fjordane sine eigne tok på seg rolla som mannekengar i høve prøvinga av klede.

Dei var noko skeptiske til om dei kom til å finne klede som passar og som dei ville føle seg ordentleg fine i.

– Eg er ein temmeleg røynleg og høgreist kar, eg fryktar at eg ikkje vil finne noko som er stort nok her. Og viss eg finn storleiken min, er nok kleda spenstige både i form og farge, seier programleiar Erlend Blaalid Oldeide.

Arianrhod Engebø og Erlend Blaalid Oldeide i bruktbutikken Om Att i Førde

KLARE FOR JULEBORD?: NRK-tilsette, Arianrhod Engebø og Erlend Blaalid Oldeide i matchande antrekk.

Foto: Borghild Andersdotter Vevle / NRK

Nynorskpraktikant Arianrhod Engebø er litt meir positiv.

– Eg har handla skjorter og større genserar frå bruktbutikkar før, men aldri finklede. Det blir spennande å sjå om eg kan finne noko som eg kan føle meg ordentleg fin i.

Erlend Blaalid Oldeide på bruktbutikken Om Att i Førde

FESTFIN: NRK Sogn og Fjordane-programleiar, Erlend Blaalid Oldeide, prøvar ein ny «look».

Foto: Borghild Andersdotter Vevle / NRK

Butikkeigar Schnitler kjem inn med hendene fulle av klede.

– No blir de fine til julebordet, seier ho og viser fram ei cowboy-liknande skjorte og ein dobbeltspent dressjakke.

– Noko for ein kvar smak

Schnitler meiner det går an å finne antrekk som er så godt som nye, sjølv om dei er brukt.

– Det er mange som kjøper seg finklede til spesielle høve, men så blir plagga berre brukte for den anledninga og etterpå blir dei hengande i skapet. Så det er mange klede som kjem inn her som ikkje er brukt meir enn den eine gongen, forklarar Schnitler.

Arianrhod Engebø i kjole på bruktbutikken Om Att i Førde

GLITTER: Nynorskpraktikant, Arianrhod Engebø, prøvde prinsessekjole.

Foto: Borghild Andersdotter Vevle / NRK

Etter å ha prøvd fleire antrekk med plagg frå forskjellige tidsepokar og trendar, er dommen som følger:

– Det passar i alle fall! Eg er positivt overraska. Det hadde blitt ein stilig julebordsdress, trur eg, seier Oldeide etter å ha prøvd på seg antrekket plukka ut av Schnitler.

– Eg likte antrekket, men trur eg måtte ha hatt litt tid på å venne meg til denne skjorta, seier Engebø om westernskjorta.

Den nye regjeringa vurderer å kvitte seg med odelslova. Det kjem ikkje på tale, svarer bøndene.
Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.