Går brannvakter gjennom natta

Etter ein over fem timar lang kamp mot flammane, var skogsbrannen i Leikanger endeleg under kontroll.

Framleis er det fare for at den kan blusse opp att.

– No skal vi ha eit oppsummeringsmøte, men det ligg an til at 12 personar frå Sivilforsvaret og to brannfolk frå Leikanger brannvesen går vakt gjennom natta, seier Olav Helge Ylvisåker hos Sogn brann og redning.

Utstyret ligg klart

Det var i 13-tida måndag at brannen vart meldt. Først klokka 1820 meldte brannbefalet tilbake til alarmsentralen at dei hadde kontroll på flammane, og at dei tok til på ettersløkkingsarbeidet.

(Artikkelen held fram under videoen)

I tilfelle at brannen startar opp att, ligg det framleis brannslangar ute. Også brannbøttene til helikoptera som medverka ligg klare til bruk.

– Det var fyll fyr i skogsbotn og trea, så det var ein ganske omfattande open eld i skogen. Sløkkingsarbeidet hadde ikkje vore så lett utan helikoptera, seier Ylvisåker.

– Helikoptera var avgjerande i sløkkingsarbeidet?

– Det var heilt avgjerande at vi fekk sett så mykje ressursar inn tidleg. Vi hadde store problem med å få fram vatnet. Terrenget er bratt med mykje stor og mindre stein, samt bergnabbar og tett vegetasjon. Arbeidet var veldig krevjande.

Ukjent årsak

Alt tilgjengeleg mannskap frå Sogndal og Leikanger brannvesen, samt 20 tals menn og kvinner frå Sivilforsvaret, kjempa ein hard kamp mot flammane. Det er førebels uvisst kva som starta brannen.

Brannen vart oppdaga i nærleiken av ei kraftline.

– Det er litt for tidleg å seie noko om, men vi kjenner til at det har vore drift og arbeid i samband med nye linjer frå Fardal til Ørskog, seier politibetjent Stein Helge Selland.

Stadfestar arbeid

Irene Meldal er kommunikasjonssjef i region vest hos Statnett. Ho stadfestar at det har vore arbeidd i nærleiken av der det brann, men legg til at dei ikkje har fått noko informasjon som tyder på at det er samanheng mellom desse.

– Vi har jobba med eit mastefundament på den nye lina frå Ørskog til Fardal, men vi veit ikkje anna enn at det har brunne i nærleiken av ein av våre leidningar, seier Meldal.