Det seier distriktsleiar i Trygg Trafikk, Audun Heggestad, etter at ei tenåringsjente vart målt til 132 km/t i snitt i ei 80-sone ved Grodås i Hornindal.
Han minner om at fart medverkar til mange ulukker og at skadeomfanget aukar med farten.
– Det er kanskje ikkje stor trafikk på nattetid, men du har trekk av dyr og folk kan faktisk gå langs vegane, seier han.
– Burde vite betre
Målinga i Hornindal er av det sjeldne slaget. Erfaringane til politiet er at tenåringane ikkje nødvendigvis er dei som køyrer fortast. Målepunkt langs vegane viser også at farten i Norge går ned.
Likevel gjer politiet ekstreme målingar som i natt.
– Det er ikkje lenge sidan føraren fekk førarkortet, men ho burde vite betre. No avgjer juristane kva som skjer vidare, seier operasjonsleiar Olaug Holme ved Vest politidistrikt i Florø.
Hengde ut vindauge
Heggestad deler uroa.
– Bremselengda blir lengre og du får kortare tid til å handle på om noko skjer. Er du i tillegg ung og uerfaren, så skjer ting fort, seier han.
I tillegg vart seks passasjerar tekne på fersken medan dei hang ut av vindauge og takluke på bilar i Stryn. Alle fekk gebyr for manglande bruk av bilbelte.
– Dette er forkasteleg og uforsvarleg. Det har vore tilfelle der folk ramlar ut og blir skadde, seier Holme.
– Dumdristig
– Dumdristig. Er du ikkje på plassen din, så har du ikkje belte. Då har du allereie brote det viktigaste trafikktryggleikstiltaket om noko skjer, legg Heggestad til.
– Dei som gjer slike ting er kanskje i feststemning, men då er det endå lettare å falle ut, seier han.
Det står ingenting i politiloggen om farten på bilane eller reaksjonar mot førarane.
– Føraren er den som er ansvarleg for at last og dei som er i bilen er forsvarleg sikra, men passasjerane skal heller ikkje uroa føraren, seier Heggestad.
Knekt nase
Festivalar har samla mykje folk både i Vik og Stryn i helga. Med det aukar også sjansen for at folk kjem på kant med lovverket. Og spesielt i Stryn har politiet hatt mykje å henge fingrane i, med fleire slagsmål, ordensuro og overstadig rusa personar.
Det kjem ikkje fram at nokon har kome til skade, men ei jente i slutten av tenåra fekk tilsyn av helsepersonell då ho meinte å ha fått noko ho ikkje tolte i drikka si.
I Vik er to menn i 20-åra melde etter at ein mann i 30-åra fekk knekt nasen.