Gratisavisa, som kjem ut i Førde, går i dag ut til alle husstandar i fylket og har eit opplag på 44.000 eksemplar.
– Fylkesmagasinet seier takk og farvel på nummer 185, fortel redaktør Roy Sunde.
Nyhenda kjem samstundes som det har blitt klart at dei fleste lokalavisene i fylket slit med fallande opplag og annonseinntekter. Det siste er òg bakgrunnen for at Fylkesmagasinet legg ned.
- Les også:
- Les også:
Lanserer planar om ny avis
Tore Fossen, som eig Fylkesmagasinet saman med Ole Jonny Klopstad, seier dei ikkje lenger får økonomien til å gå rundt.
– Alle avisene har sett at papirannonseringa har gått tilbake dei siste åra, det har òg ramma Fylkesmagasinet. Vi ser at det ikkje lenger er grunnlag for å gje ut ei slik avis til alle innbyggjarane i Sogn og Fjordane, seier han.
Same dag som nedlegginga vart kjend, lanserer dei planane for ei nytt produkt. I tråd med tida vil det bli ei sterkare satsing på nett, samt at nedslagsfeltet blir noko redusert.
– Det blir ikkje fylkesdekkande i denne omgang. Det blir eit papirprodukt, men vi kjem til å kombinere det mykje tettare opp mot nett. Vi må gå den vegen vi òg, som alle andre, seier Fossen.
Gravøl
Nedlegginga viser kor store endringar som er i ferd med å skje i bransjen, sjølv om den digitale tidsrekninga har gjort sitt inntog for lenge sidan. Annonsørane ser i aukande grad etter alternative kanalar å bruke annonsekronene.
– 2013 var det beste året vi nokon gong har hatt. 2014 var noko svakare, men framleis eit godt år. Men i år var det seigt, seier Sunde.
Dei tykkjer begge det er vemodig å leggje ned avisa etter fjorten år. Dei har møtt mykje kjekke menneske, og fått både ris og ros av lesarane undervegs.
– Når vi hadde laga den siste utgåva og eg hadde kome heim og sett meg i sofaen, så måtte eg berre reise meg att og hente ei øl og ta ei form for gravøl, seier Fossen.
No håpar dei den nye avisa skal ta noko av arven vidare.
– Vi har ikkje tenkt å legge oss ned og la papiravisene døy ut med oss, seier Sunde.
