– Det blir ein veldig spennande dag. Vi håpar at dei vel å bevare Sandane lufthamn saman med dei tre andre luthamnene i fylket, seier Ingvill Hestenes som er dagleg leiar i Melin Medical på Sandane.
Selskapet leverer betalingsautomatar til helsevesenet, og har hovudkontor på Sandane i Nordfjord. Herfrå er det 10 minutt til nærmaste flyplass i dag, nettopp det var ei viktig årsak til at bedrifta med 60 tilsette plasserte hovudkontoret sitt i Gloppen.
- Les også:
- Les også:
– Vil bremse investeringslysta
Ei nedlegging av Sandane lufthamn Anda kan ha motsett effekt på satsinga, då blir reisetida til nærmaste flyplass rundt to timar.
– Det kan heilt klart vere med å bremse investeringa på Sandane framover. Det opplever eg som litt rart. Når vi ser at fylket er fylt av guts og engasjement, og eit næringsliv som ønskjer å satse, så kvifor skal ikkje det offentlege legge til rette for ein god infrastruktur slik at det kan skje, undrar Hestenes.
- Les også:
I dag vil Avinor legge fram sin rapport om framtida sin flyplasstruktur for kortbaneflyplassane over heile landet, med unnatak av Nordland og Fagernes som har eigne prosessar. Rapporten skal ut på høyring, og tilrådingane kan bli ein del av Nasjonal transportplan.
Kjempar for kortbanenettet
Melin Medical har kvar einaste veke mange tilsette som treng raskt tilgang til marknadar og leverandørar kring om i Norge og Norden.
– Denne veka har vi fire tilsette på reise, vi har folk frå Danmark og Sverige. Så totalt har vi ein 10–12 reiser denne veka, seier Hestenes.
Også lokalpolitikarane er spente i dag. Svein Ottar Sandal er leiar for interessegruppa for Sandane lufthamn Anda og vil kjempe for kortbanenettet.
– Eg håpar inderleg at Avinor kjem med ei offensiv satsing på kortbanenettet og at det er ein del av det totale nettverket som ein har av flyplassar i Norge, seier Sandal.
Men Avinor har innsparingskrav over seg, og kortbanenettet er dyrt i drift. I tillegg er reisetid og avstandar mellom flyplassar blitt mindre i takt med at vegnettet blir utbygd.
Håpar på politisk fleirtal
Sandal som også er ordførarkandidat for Gloppen KrF håpar at eit fleirtal på Stortinget likevel ikkje vil støtte at kortbanenettet blir redusert.
– Politisk trur eg vi har ei god sak. Flyplasstrukturen og kortbanenettet er politisk bestemt så der trur eg vi har gode argument heilt inn til toppane på Stortinget.
- Les også:
Ingvill Hestenes er stolt over at verksemda hennar har suksess med base i Sogn og Fjordane, slik håpar ho det blir også framover.
– Mantra vårt har vore at innovasjonen og verdiskaping kan skje i distriktet. Vi er tydelege på at samarbeidspartnarane våre skal komme til Sandane og sjå og oppleve Nordfjord – bu på hotellet og bruke opplevingane våre her. Debattane som skjer no skaper uvisse i næringslivet.