«Ikkje vår oppgåve å berge Kystmuseet»

Bygningane treng vedlikehald for 13,5 millionar kroner, og Musea i Sogn og Fjordane har bede vertskommunen Flora medverke med 5,4 millionar kroner.

Overfor Firdaposten kallar rådmann Terje Heggheim det for ei prinsippsak når han no vil seie nei til søknaden.

• LES OGSÅ: Forfallet ved kystmuseum kostar 13 millionar

– At stoda er som den er på Kystmuseet meiner eg speglar at Musea i Sogn og Fjordane ikkje har valt å prioritere løpande vedlikehald. Det må dei ta ansvar for og rydde opp i, seier Heggheim.

Åtvara for to år sidan

Allereie for to år sidan åtvara konservator Berit Høyvik mot forfallet ved Kystmuseet. Det skjedde samstundes som ein var godt i gang med å realisere nytt museumsbygg i Førde.

• LES OGSÅ: Musea manglar 30 millionar kroner - no ber dei om meir pengar

– Det er vel kjekkare å opne nybygg enn å halde ved like alt som finst, sa ho og meinte kystmuseet var i ferd med å rotne på rot. To år seinare er altså ikkje situasjonen betre.

– Problema blir meir og meir synlege og er i ferd med å svekke begge bygningane, sa Høyvik for få dagar sidan til Firdaposten.

Uroa for museet

No har altså rådmannen i kystkommunen levert si saksinnstilling, med negativt svar til Musea i Sogn og Fjordane.

Overfor avisa vedgår han at han er uroleg på vegner av Kystmuseet.

– Ja, det skal eg ikkje leggje skjul på. Eg veit korleis den økonomiske situasjonen er, og eg ser kva utfordringar det kan by på framover. Eigarane må etter mitt syn no på bana og avklare både rammevilkår og korleis ein organiserer seg vidare, seier Heggheim.