NRK Meny
Normal

Framleis på botn av tabellen

Sjølv ikkje med to nye spelarar på laget klarte ikkje Eid å sikre seg sigeren på heimebane mot Florø laurdag. Men Eid-trenaren er optimist.

Eid - Florø

MÅLSCORAR: Bjørn Totland driblar seg forbi Stefan Aase og Florø sin tomålsscorar Halvor Solheim Olsen.

Foto: Stig Høynes

Eid har ikkje fått ein siger sidan dei spelte mot Florø i serieopninga. Laget ligg på botn av tredjedivisjons-tabellen med berre seks poeng.

I dag spelte dei mot Florø på Eid Stadion, og kampen enda med stillinga 1-3. Det var fortent meiner Eid-trenar.

– Florø var totalt sett best i heile kampen. Dei hadde ein mykje betre andreomgang enn vi hadde, og vi klarte ikkje å henge med. Vi hadde nokre bytte med folk som vart skadd, og vi fekk slitne bein rett og slett, seier Frode Nord.

Jamn førsteomgang

Førsteomgang var derimot jamn, seier Eid-trenaren. Florø hadde eit par sjansar og hadde fleire dødballsituasjonar enn Eid, som hadde ein stor sjanse.

– I andre omgang vert vi pressa bakover i bana. Florø er eit jamngodt lag med mange, unge gutar, seier Nord.

Dei tre Florø-måla vart sett inn av Kristoffer Ryland og Halvor Solheim Olsen som scora to mål i kampen.

To raude kort vart delt ut i kampen, eit til kvart av laga.

– Det var tøffe tak, seier Nord.

(Artikkelen held fram under biletet)

Eid - Florø

TØFFE TAK: Henrik Salveson i duell med Florø sin fyrste målscorar Kristoffer Ryland.

Foto: Stig Høynes

Ny spelar scora Eid-mål

Framfor haustsesongen har Eid styrka stallen sin med fleire rutinerte spelarar. I dag var Bjørn Totland og Henrik Salveson med. Totland stod for Eid sitt einaste mål i kampen, etter ei målpasning frå Salveson. Trenar Nord fekk eit godt inntrykk av spelarane etter dagens kamp.

– Dei er litt kamprustne, men vi ser at dei bidreg til at vi blir eit betre lag. Dei kjem til å bli med oss fleire kampar utover i sesongen, seier Nord.

– Dei er teke inn for å sjå om vi kan berge plassen, så det er litt brannsløkking. Vi må prøve å få bygge opp att ein ny spelarstall på heimebane så vi får trent skikkeleg heime. Desse spelar jo stort sett berre kampar for oss, seier han.

– Sterkt lag

Trass tapet i dag meiner Nord at dagens Eid-lag er det sterkaste laget dei har stilt, i alle fall på papiret.

– Treningsmessig så er vi ikkje på høgde med Florø. Det hadde vore bonus å få poeng i denne kampen, men vi gjekk jo for å vinne. Men vi orkar ikkje nok i forhold til det dei gjer, seier Nord.

Neste helg møter dei Voss på bortebane, og Nord trur Eid vil stille med eit bra lag både då og i kampane framover.

– Laget blir styrka no, heilt klart, og det trur eg motstandarane kjem til å merke, seier Eid-trenaren.

Han er optimistisk til at dei kan gjere det mykje betre på haustsesongen.

– Men det blir litt lotteri om vi klarar å ta nok poeng for å hente inn nok lag. 20 av 33 poeng trur eg vi minst må ta for å klare å komme opp på ståplass når vi er ferdig med sesongen, så vi kan ikkje tape for mange kampar, seier han.