For denne helga er det Køntri som står på programmet i Eivindvik.
Hardtslåande rytmar under Kongestatuen i Skjerjehamn er bytta ut med cowboyhatt og boots på tusenårsstaden Gulatinget.
- Les også: Dette skjer i fjordfylket i sommar
– Det er ein gyseleg flott plass, og den tenkte vi burde brukast til noko. Og country passar flott inn her, seier festivalsjef Viggo Randal.
Håpar på 2 000
Det er første året at dei prøver seg med countryfestival i Gulen. Fredag kom 700–800 hovudsakleg tilreisande personar for å få med seg Staut og Sie Gubba.
I kveld vil venteleg lokalbefolkninga få lufta dansefoten sin. Randal håpar på 1 400–1 500 når hovudtrekkplasterer Gunslingers entrar scena.
– Vi håpar på kring 2 000 besøkande denne helga, og det trur eg vi skal klare. Vi treng noko mindre for å gå i balanse, men det er greitt å ha litt å gå på når vi startar planlegginga til neste år, seier han.
– Er eit behov
For arrangørane har ikkje tenkt å sleppe taket på countryen heilt enno. Randal meiner blir det litt feil å blande til dømes Vassendgutane inn i rockeprofilen til Utkant.
For det er same gjengen som arrangerer Utkant som no står for Køntri.
– Dette er eit supplement til Utkant, som vi allereie arrangerer, seier Randal.
– De har ikkje tenkt å ta opp kampen med Norsk Countrytreff på Breim?
– Eg trur nok vi kan sameksistere, og erfaringane frå Utkant er at dette er etterspurt. Det er kultur for country på Vestlandet, og det er tydelegvis rom for ein festival til.