Mo kjem frå stillinga som stabssjef i Framstegspartiet, der han også tidlegare har vore generalsekretær. Politikaren som er fødd i Lærdal har vore blant dei mest kjente Frp-toppane i fleire år, det trass i at han ikkje har vore blant partiet sine stortingspolitikarar.
Forbundsleiar i NLF, Per Madsen, skriv på forbundet sine heimesider at Mo har viktige eigenskapar, mellom anna i form av leiarerfaring får ein stor organisasjon. Han seier prosessen med å finne ein etterkommar til Olav Slaatsveen har vore krevjande.
– Vi er sikre på at Geir A. Mo er rett mann til å styre NLF i ein periode med store krav til effektiv kontakt med styresmaktene og organisatorisk fornying, seier Madsen.
Sjølv seier Mo i ei pressemelding at han har funne ut at tida no er inne for at han skal skifte beite og arbeide med noko anna enn partipolitikk.
– NLF er ein spennande organisasjon som står overfor store utfordringar med internasjonalisering, auka innanlands konkurranse og farane for sosial dumping, seier han.
Mo byrja som gruppesekretær i Framstegpartiet i 1990, og tok over som generalsekretær i 1994. Han leia partiet sin administrasjon fram til 2009 då han vart stabssjef for partileiar Siv Jensen.
Mo byrjar i stillinga som administrerande direktør i NLF 6. august. (NTB/NRK)