NRK Meny
Normal

Frå fjord til bord på få timar

KALVÅG (NRK): Jakta på ein fersk, stor og herleg torsk er drivkrafta for mange fiskarar. I dag var NRK på torskefiske på kysten av Sogn og Fjordane. Kort tid etter vart fisken servert på bordet ved Knutholmen i Kalvåg.

På fisketur i Bremanger

PÅ FISKETUR: Gro Ravnestad, Stian Sjursen Takle og Erling Igland på fisketur ved Kalvåg i Bremanger. På leit etter stor og fin torsk til middag.

I det morgonen har blitt lys, og himmelen klar og blå, legg fiskaren Erling Igland frå kai i sjarken sin «Igland». Han skal trekkje garn i sjøen der han håpar å få fisk til dei unge kokkane som har overteke kjøkkenet på Knutholmen i Kalvåg.

– Eg har ikkje så sterk tru på at vi får så mykje. Det er nok for tidleg på sesongen. Men vi kan jo håpe, seier Igland på veg utover idet vi ser Kalvåg bak båten.

Ein flott torsk

Etter ein kort tur sør for fiskeværet ligg den oransje blåsa som markerer staden der dei åtte garna ligg plassert i sjøen. Erling tek tak i tauet og startar å dra opp lenka.

– Nei, her ser det ikkje lyst ut. Eg ser eit par krabber som kjem her, men ingen fisk. Eg håpar jo at det skal ta seg godt opp litt seinare utpå våren. Det gler eg meg til, seier Igland.

Men så dukkar det brått opp ein fin torsk på fire-fem kilo ved ripa. Jubelen er stor, og dermed er middagen og råvarene til kokkane redda.

Jakta på ein fersk, stor og herleg torsk er drivkrafta for mange fiskarar. I dag var NRK på torskefiske på kysten av Sogn og Fjordane. Kort tid etter vart fisken servert på bordet ved Knutholmen i Kalvåg.

Fersk og lekker mat

Inne i Kalvåg ventar nemleg Martine Røys Fosse og Martin Sveian som er kokkar ved kjøkkenet på Knutholmen i Kalvåg. Martine er dotter av Svein Inge Fosse som har bygd opp Knutholmen gjennom mange år.

For eitt år sidan flytta ho og kjærasten attende til Kalvåg for å ta over drifta av kjøkkenet her. Begge to har erfaring frå juniorlandslaget for kokkar.

Då båten kjem til land får den fine torsken ei hovudrolle i NRK si direktesending frå Kalvåg denne dagen. For her blir den filetert, steikt og servert med blåskjelsaus og grønsaker av dei unge dyktige kokkane.

Fantastisk råvare

– Torsk er ei fantastisk råvare som vi er veldig glade i. Det å få fisk og skaldyr rett frå sjøen her er jo ein draum for ein kokk, seier Fosse.

Her får du oppskrift og framgangsmåte til det nydelege torskemåltidet.

Steikt torsk, blåskjelsaus med kråkebolle,
variasjon på selleri og grønkål.

Torskemiddag

TORSK: Denne torsken vart trekt opp frå havet i morgontimane, og få timar etter enda han slik på middagsbordet.

Foto: Borgar Sagbakken / NRK
  • Torsk.
  • Filetert torsk vert delt i porsjonsstykker. Steik i solsikkeolje i ei glovarm steikepanne. Krydre med salt og pepar. Når fisken har fått ei gyllen og fin stekeskorpe har vi i 2ss usalta smør og snur fisken.
  • Den er ferdig når den flakar seg.

Blåskjelsaus smakt til med kråkebolle:

  • 2 dl blåskjelkraft
  • 2 dl fløyte
  • 1 kråkebolle

– kok opp og jamn med maizenna som er rørt ut i kaldt vatn.
– Trekk sausen til sida og smak til med sitronsaft og køyr inn rogn frå ein kråkebolle med stavmixer. Sil sausen.

Variasjon på selleri
Selleripuré: skrell ein selleri. Kutt den i bitar og kok mør i salta vatn. Køyr opp på mixer saman med 1–2 ss creme fraiche til passe konsistens. Selleriskiver: rå selleri skiva på mandolin/ ein ostehøvel kan også brukast. Legg dei i isvatn slik dei blir crispy.

Variasjon av torskemiddag

VARIASJON: Det meste av grønsaker kan brukast når ein har fisk på menyen.

Foto: Borgar Sagbakken / NRK

Grønkål
Ha 1 ss usalta smør i ei steikepanne. Ha grønkålen så vidt i panna. Steik det forsiktig på låg temperatur. Smak til med salt og pepar.
Grønkål dett fort saman, så ver forsiktig med varmen.

Jakta på ein fersk, stor og herleg torsk er drivkrafta for mange fiskarar. I dag var NRK på torskefiske på kysten av Sogn og Fjordane.

Musikk: Elevar frå Bremanger kulturskule

Stor auke i bedriftar som tilbyr opplevingar til turistar
Fotballfeber i Florø før tidenes første fjerderundekamp i cupen
veger, arbeid med reparering etter flommen, hotell, gjestehus, parkeringsplasser med busser, busser