Fossar fram mot ny kommune

Rett før jul vedtok formannskapa i Eid og Selje å forhandle om intensjonsavtale. Målet er å avgjere om ein skal slå seg saman denne månaden.

– Forhandlingane går eigentleg veldig greitt, seier ordførar Stein Robert Osdal (KrF).

• LES OGSÅ: Eid vil slå seg saman med Selje
• LES OGSÅ: Selje vil ha Nordfjordeid som kommunesenter

– Droppar truleg folkerøysting og innbyggarhøyring

I juni 2017 skal Stortinget vedta kommunekartet. Osdal trur ikkje det blir tid til rådgivande folkerøysting eller innbyggarundersøking. Under forrige runde i sommar vart ikkje folk høyrde om ei samanslåing Eid/Selje i staden gjaldt andre alternativ.

– Det var sett ein frist frå regjeringa til 1. juli i fjor, og den vart igjen utsett til årsskiftet. Så vi er på overtid av overtida. Vi har knapt tid til å informere folk om kva vi kjem fram til, eller gi dei tid til å røyste. Det vi baserer oss på no er folkerøystinga vi har hatt, og dei tidlegare innbyggarundersøkingane, seier Osdal.

Er tidspresset ei svakheit?

– På ein måte, men så har vi gode følarar i lokalmiljøet og det har nesten ikkje vore protestar i det heile teke til Selje-Eid.

• LES OGSÅ: Kan bli kommunesamanslåing med tvang

Senterpartiet vil ha innbyggarhøyring

Fylkesmannen tilrådde å tvangssamanslå Selje og Vågsøy, men politikarane i Selje går heller mot Eid, men med invitasjon til at Vågsøy og Vanylven blir med.

Gruppeleiar for Senterpartiet Gunn Sande vil på si side ha ei innbyggarundersøking.

– For Selje sin del skal vi ha formannskapsmøte den 16. og kommunestyremøte den 26. og i løpet av desse ti dagane bør vi få det til.

Sande ville helst at Selje skulle halde fram åleine, men går no for Eid.

– Fylkesmannen føreslår ei tvangssamanslåing med Vågsøy, og eg er redd det vil skje i Stortinget til våren om vi ikkje er aktive. Då er det betre å lage ein region saman med Eid.

Kvifor er det meir aktuelt med Eid enn med Vågsøy?

– Det spørsmålet trur eg ikkje eg vil kommentere.

Fleire trur på innbyggarhøyring

Også Marita Aarvik i Frp vil gjerne ha innbyggarhøyring, men er positiv til samanslåing med Eid.

– Vi må ta styringa sjølve, om vi ikkje gjer noko er faren stor for at det skjer ting som vi ikkje ynskjer.

Judith Kvåle som sit for Tverrpolitisk liste delar synet:

– Ei innbyggarundersøking kan vere vegen å gå, dersom vi rekk det. Eid har synt betre forståing for dei tinga som er viktig for Selje.

Bjørlo: – Har ikkje bestemt seg

Eid-ordførar Alfred Bjørlo (V) har ikkje konkludert om innbyggarhøyring i Eid.

– Vi har ikkje hundre prosent konkludert, men vi veit alt mykje om kva folk tenker om kommunesamanslåing.

Bjørlo har tru på at forhandlingane vil føre fram.

– Det er absolutt ein veldig god tone. Dette er to kommunar som har eit felles utgangspunkt i at vi får betre tenester og ei betre framtid ved å vere i lag.