Det skal bli langt fleire om rassikringsmidlane dersom Statens vegvesen får det som dei vil.
For Samferdsledepartementet føreslår å inkludere middels rasutsette fylkesvegar når midlane til skredsikring skal delast ut. Det kjem fram i eit skriv NRK har fått tilgang til.
– Mi klare melding til departementet er å sjå på kvar rasfaren er størst og fordele midlane deretter, seier fylkesordførar i Sogn og Fjordane, Jenny Følling (Sp).
Geografisk fordeling
Regjeringa har i Nasjonal Transportplan sett av 12 milliardar kroner til rassikring av fylkesvegane for 2018-2029. Av dette skal vel 4,4 milliardar fordelast første seksårsperiode.
Til no er midlane i hovudsak prioritert høg skredfaktor. Statens vegvesen meiner det gir ei betre geografisk fordeling å inkludere middels skredfaktor.
– Vi viser dessutan til at fordeling etter høg skredfaktor kan føre til at enkelte fylkeskommunar gjennomfører prosjekt med middels skredfaktor slik at dei ved neste rullering av NTP/handlingsprogram sit med same grunnlag for fordelinga, skriv fungerande vegdirektør, Bjørne Grimsrud.
Får ein
Desse argumenta kjøper ikkje fylkesordføraren i Sogn og Fjordane. På skredfaktorskalaen har fjordfylket 80 punkt i kategorien høg som er kostnadsrekna til 7,6 milliardar kroner.
Legg ein til middels rasutsette punkt er ein oppe i 163 raspunkt og eit behov for 8,5 milliardar kroner. Statens vegvesen vil løyve 1,2 milliardar kroner.
– Vi får kanskje tatt det som står på første og andre plass, men står att med 78 prosjekt med høg skredfaktor. Samstundes ser vi at nokre fylke får løyst alt i høg og middels ramme, seier Følling.
– Egoistisk?
I haust blir det klart kva fordelingsnøkkel departementet landar på.
Får vegvesenet medhald betyr det mindre rasfarleg prosjekt i andre fylke får midlar framfor meir rasfarlege prosjekt i andre fylke.
– Eg ventar at regjeringa nyttar høg rasfaktor som hovudprinsipp, slik at dei mest rasfarlege vegane blir prioritert. Det er viktig fordi det er ein nasjonal standard for korleis rasfaktoren er rekna ut, og då må ein halde seg til det når ein fordeler pengane, seier Følling.
Ikkje egoisme
– Er ikkje dette ei egoistisk haldning?
– Nei, det er ikkje egoistisk å sikre dei rasfarlege vegane først. Det trur eg dei som bur langs vegane, køyrer skulebus og ferdast der kvar dag kan skrive under på. Det er ikkje kjekt å vite at det er høg risiko for at det kan komme ein stein i hovudet.
– Har ein etablert ein nasjonal standard for rasrisiko på vegnettet, så er det prinsippet som må gjelde ved fordeling av rasmidlane. Det er dei mest rasutsette vegane som må sikrast først, avsluttar ho.
