– Spelet vil vise realistiske konsekvensar av flaum, og gje deg ei betre forståing av årsak og verknad, seier Oddbjørn Bruland, professor i vatn og miljøteknikk, ved NTNU.
Han fekk ideen til spelet då han så ungane sine spele Fortnite.
I 2017 stod han sjølv med føtene midt i flaumen, då storelva i Utvik flauma over. Tomta der han vaks opp vart skyldt på fjorden, men han var heldig likevel. Huset stod midt i elva, der straumane gjekk på kvar side. Familien greidde å rømme i tide.
Opplevinga motiverte Bruland til å kome opp med nye tankar om korleis ein betre kunne føresjå konsekvensar av slike flaumar.
– Hadde dei kunne sett kor alvorleg ein stor flaum i Storelva kunne bli, kunne ein kanskje ha sett inn tiltak før det skjedde, seier han.
LES OGSÅ: Dei ville bygge ei framtid – men staten vil heller at garden skal rotne
– Auke merksemda om kva som skjer
– Teknologien kan vise seg å bli svært nyttig, ikkje minst for å bevisstgjere folk som bor langs små og store vassdrag, seier Hege Hisdal, hydrolog i Noregs vassdrag- og energidirektorat.
Ho presiserer at det er både praktiske og tekniske utfordringar med å få undersøkt og laga modellar av alle små og mellomstore vassdrag i Noreg.
– Skal spelet ha realistisk nytte med så realistiske scenarium som mogleg, må ein ha detaljert høgdekartlegging for det spesifikke området.
LES OGSÅ: Klimaendringar gir meir flaum og skred
Ho er likevel klar på at det er «kjempebra å få eit spel som kan auke merksemda og formidle ut i kommunane kva som skjer».
– Sjølv om naturkatastrofar svært sjeldan inntreff, er det viktig å ha kunnskap når det fyrst skjer.
– Enkelt å bruke
Bruland seier det viktigaste ikkje er å sikre heile vassdrag, men å forstå kva faktorar som forårsakar dei største problema – og med det hindre store materielle skadar og tap av menneskeliv.
– Eg håper det kan bli eit vektøy som er såpass intuitivt og enkelt å bruke at kommunane kan gå inn å vurdere dei ulike vassdraga i kommunen på ein relativt grei måte.