– Det var godt med første tre poenga for sesongen. Det var veldig godt, seier ein letta Førde-trenar, Knut Erik Folland
Kampen opna med ein farleg sjanse til Førde etter berre fem minutt, men keeper fekk avverja forsøket frå Thor Jørgen Spurkeland.
Ålgård best i første omgang
Men etter dette tok Ålgård meir over, likevel utan å skape veldig mange moglegheiter framfor mål. Det vart med eit par farlege skot, eit innlegg frå høgre som trefte nærmaste stolpe og ein corner som var på veg rett i mål, før Førde fekk redda på streken.
– Første omgang var svak, vi fekk ikkje rytme i spelet, fekk det ikkje til å gli, seier Folland.
Før pause var kampen prega av harde duellar og mykje kriging. Det var langt mellom høgdepunkta.
– Det var ein krigekamp. Av og til blir kampar slik. Vi har spelt betre i dei førre kampane denne sesongen, seier trenaren.
– Tre poeng viktigast i dag
Det var ikkje mykje meir finspel i andre omgang. Berre eit halvt minutt ut i andre omgang heada Alexander Ødegaard inn det einaste målet i kampen.
– Dette var ikkje ein god kamp, men vi slåst hardt for dei tre poenga. Det var ein svak førsteomgang og andre var litt betre. Men det drit eg i. I dag var dei tre poenga det viktigaste, seier Folland.
For etter ein tøff start med tap i dei to første seriekampane, og mot Florø i cupen, tok Førde i ettermiddag sin første siger for sesongen.
– Det var veldig viktig, vi har no snudd trenden frå starten av sesongen. Det gir oss mindre stress framover, når vi skal jobbe vidare. Og vi har mykje å ta tak i. No får vi ro til å gjere den jobben, seier Folland.
Målmann Ante Knezovic hadde fleire gode involveringar i kampen, spesielt i feltet.
– Han var god, og hadde ei svært viktig redning heilt på slutten. Vi har to gode målmenn.