– Me følte oss veldig einige og klare for å flytte heim

– Me ville heim. Me hadde eigentleg ikkje prata om det, me berre tok det opp og me følte oss veldig einige og klare for å flytte heim rett og slett, seier Mariell Øyre.

Etter fem år i London reiste ho og ektemannen heim til Lærdal. No opnar ho butikk og fotostudio.

– Ironisk nok flytta me heim for å ha mindre å drive med, og så enda me opp med å starte butikk. Men det er jo fantastisk, det hadde me jo aldri gjort viss ikkje me hadde flytta heim, seier Mariell Øyre.

• Les også: Dei var dei rare i klassen som fann kvarandre - no lever dei livet i lag i London

Sterk sentraliseringstrend

Stadig færre gjer som Mariell Øyre og flyttar tilbake til bygda. Tendensen er at unge som flyttar til byane for å studere eller finne seg arbeid, etablerer seg der, eller i området rundt.

Ifølge forskar ved Statistisk sentralbyrå, Stefan Leknes, er det ei sterk sentraliseringstrend i Noreg.

– Enkelte flytter tilbake igjen, men generelt viser dei store tala at dei kreftene er ikkje sterke nok til å hindre urbaniseringstendensen, seier Stefan Leknes.

Denne tendensen har ifølge forskaren gått føre seg sidan starten av 1800-talet, og det er naturleg å tru at det kjem til å halde fram.

Fyller gamle lokale

I Lærdal prøver ein å motverke sentraliseringstrenden med nye verkemiddel. Kommunen er plukka ut av Design og arkitektur Norge (DOGA) til å vere ein del av «Levende lokale», eit prosjekt der ein med fokus på kunst, kultur og design prøver å skape nytt liv i tomme sentrumslokale.

– Vi skal utvikle ein stad som folk har lyst å reise til og bli verande i, og dei skal ha lyst til å skape ting herifrå. Då er det relasjonen mellom oss menneske som legg grunnlaget for om folk blir verande eller ikkje, meiner Tone Boska, prosjektleiar i Lærdal.

Dei har invitert lokalsamfunnet med på ulike aktivitetar, og jobbar med å sette den lokale identiteten inn i nye samanhengar. Slik vil dei både skape eit levande sentrum på Gamle Lærdalsøyri, og gjere staden attraktiv å etablere seg i.

• Les også: Pilotprosjekt skal gjøre sentrum mer levende

Ei framtid i Lærdal

For Mariell Øyre har prosjektet vore ein utløysande faktor for at ho opna butikk.

No er både eigendesigna produkt og nøye utvalde varer som sjokolade, bøker og keramikk på plass i det rosa trehuset. Mariell Øyre ser for seg ei framtid i Lærdal, saman med ektemannen og si eitt år gamle dotter.

– Ein føler verkeleg på at det skjer noko no, og det er veldig fint, smiler Mariell Øyre.

• Les også: Ungt kjærastepar trassar forfattarmyten
• Les også: Ho er ei av få som bloggar på nynorsk