– Det var herleg. Eg har ikkje ord, seier Benmoussa som blei den store helten.
Han takkar lagkamerat, Simen Solheim for ein fin pasning. Og etter kampen var det full jubel i Florø-garderoben.
– Det var veldig herleg. Det var ein jamn kamp som kunne gå begge vegar. Det er viktig for gruppa å få stadfesting på at det vi jobbar med er rett, seier Florø-trenar Terje Rognsø.
Det same skjedde i 2012. Då var Florø i 3. divisjon og var stort sett samansett av juniorar. Det å ta skalpen på Sogndal var noko av det største dei kunne tenke seg. Og det gjorde dei. Til slutt vart det 3–0 til Florø, og Sogndal vart audmjuka framfor 1500 elleville tilskodarar.
- Les også:
Skuffa Bakke
Sogndal-trenar Eirik Bakke seier den førre gongen framleis sit i han. Då spelte han sjølv på Sogndal. Utanom Eirik Schulze og Kjetil Wæhler stilte dei med toppa mannskap. Han tek reprisen også litt tungt.
– Det er sjølvsagt skuffande. Men det var ein god keeper hos motstandarane som redda Florø i dag, seier Sogndal-trenar Eirik Bakke.
– Sogndal var gode i dag synest eg, men dei scorar ikkje på sjansane sine. Det var godt for sjølvtilliten å ta den, seier keeper Nicklas Frenderup.
Christer Husa sette ballen i eige mål då Sogndal tok leiinga i kampen, men trengde ikkje sørge over det lenge før Florø fekk overtaket.
– Det typisk å komme tilbake frå skade og øydelegge det, tenkte eg. Men heldigvis greier gutane å snu det og score to fine mål, seier Christer Husa.
Monir Benmoussa og Rashad Muhammed snudde kampen i løpet av fem minutt, og med det er Florø for første gang vidare til fjerde runde i cupen.
Åtte elleville minutt
Etter vel timen spelt skjedde alt samtidig på Florø Stadion. Først var Florø-spelar Christer Husa uheldig og heada ein corner frå Gilbert Koomson i eige mål, men få minutt etter parkerte Rashad Muhammed heile Sogndal-forsvaret og sette inn utlikninga til 1–1.
Og fem minutt etter stod jubelen i taket, då Monir Benmoussa snudde kampen for Florø med si 2–1 scoring.
- Les også:
Kvar sin sjanse
Dei største sjansane til begge lag kom på slutten av andre omgang. Først for Sogndal og Gilbert Koomson som sette fart og sprang frå Florø-forsvaret, og kom åleine gjennom med Florø-keeper Nicklas Frenderup.
I staden for å avslutta sjølv, sentra han tvers over til Martin Ramsland, som enkelt kunne sett inn 1–0 til Sogndal, men Frenderup varta opp med ei feberredning.
Minuttet etterpå fekk Florø sin Endre Kupen stå åleine å heada på bakre stolpe, men headinga vart for dårleg og enda utanfor.