Kraftig vind og mykje nedbør har prega vestlandet det siste døgnet. Det kan skape problem for dei som skal køyre mellom vest og aust.
– Dei som skal over fjellet i dag bør pense seg inn på Filefjell, seier Jan Erikstad hos vegtrafikksentralen i Lærdal.
Tysdag kveld kunne Vegvesenet melde at det var tre kuldegrader, redusert sikt og snø- og isdekke på vegbana på Europaveg 16 over Filefjell. For mange vil det likevel vere det einaste alternativet.
– Det er veldig gode lys over Filefjell, så det skal gå greitt å køyre over der, seier Erikstad.
Fleire stengde fjellovergangar
Allereie nyttårsaftan vart fleire av fjellovergangane stengde. Erikstad trur ikkje dei opnar med det første.
– Det er meldt vind frå nordvest ei god stund framover, og så lenge det kjem nedbør så blir det litt leit føre.
Nokre av fjellovergangane har kolonnekøyring, men Erikstad seier at spesielt Hemsedalsfjellet kan bli stengd på kort varsel.
Her er status for fjellovergangar i Sør-Noreg onsdag kl. 07:57
- E 6 Dovrefjell – ope
- E 134 Haukelifjell – ope
- Rv. 3 Kvikne – ope
- Rv. 7 Hardangervidda – ope
- Rv. 9 Hovden-Haukeli – ope
- Rv. 13 Vikafjellet – ope
- Rv. 15 Strynefjellet – stengt. Rasfare og uvêr. Ny vurdering klokka 9.
- Fv. 27 Venabygdsfjellet – ope
- Fv. 50 Aurland-Hol – ope
- Rv. 52 Hemsedalsfjellet – ope
- Fv. 53 Tyin-Årdal – stengt
- Fv. 705 Stuggudal-Brekken – stengt
Sjå oversikt hos Statens vegvesen.
Ein vindfull start på 2019
Det ruskete vêret kom ikkje som noko overrasking. Tidleg nyttårsaftan sa meteorologane at det ikkje kom til å bli ein lovande start på det nye året, vêrmessig.
– Det blei akkurat som vi trudde – nordvestleg, kraftig vind, seier vakthavande meteorolog i Bergen, Geir Ottar Fagerlid.
Og vinden gir seg ikkje med det første.
– Det skal blåse kraftig lenge, men til kvelden skal det roe seg litt. I morgon skal det vere betre, seier meteorologen.