Honningcentralen vil ha meir norsk honning, Bama vil ha meir frukt.
Saman med Norges Birøktarlag, Gartnerhallen og Norgesgruppen har dei tatt initiativ til PolliVest. Pilotprosjektet skal auke samarbeidet mellom birøktarar og fruktbønder i Sogn og Fjordane og Hordaland.
Pollinering er overføring av pollenkorn mellom blomane for at det skal kunne føregå ei befruktning. Gjennom auka bruk av bier til pollinering, håpar dei på meir honning og større avlingar på frukt og bær.
Bia og blomen
I ein morellhage i jordbrukskommunen Lærdal står nestleiar i Norges Birøktarlag, Marco Neven, bøygd over ein summande bikube.
– 1, 2, 3..., alt no, etter 10 sekund er det 20–30 bier her. Kvar bie har vore på kring 100 blomster. Det vil igjen seie at dei til saman har pollinert 2500 blomster på runden si. Så kan vi begynne å rekne på kor mykje det blir i løpet av eit døgn.
Neven har leigd ut kubane sine til frukt- og bærbøndene i dalen i ei årrekke. Ei ordning både han, bøndene og ikkje minst biene er nøgde med.
Når bløminga i til dømes morellhagen er over, vert bikubane frakta vidare til neste matfat; bringebæråkeren. Der forsyner dei seg av pollen og nektar som gir næring til bie-samfunnet, samstundes som dei pollinerer ei avling bær.
God investering
– At han leiger ut bier er viktig for oss fruktbønder. Dei tusenlappane me brukar på dette i sesongen er ei veldig god investering for oss, seier leiar for Lærdal Grønt, Harald Blaaflat Mundal.
Nina Heiberg, forskingssjef i Gartnerhallen og prosjektleiar i PolliVest, er samd.
– Tal frå Hardanger Fjordfrukt syner at fruktbøndene som leier bikubar prosentvis får mykje større avling enn dei som ikkje gjer det.
– Gjennom prosjektet kartlegg vi kvar det trengst fleire bier, vi informerer om nytta, og vi legg til rette for å få fleire til å starte med næringsretta birøkt til pollinering og honningproduksjon, fortel Heiberg.
På grunn av faren for sjukdomssmitte mellom biene er det viktig å ha birøktarar heimehøyrande i alle distrikta, slik at ein slepp flytting mellom regionane grunna leige.
God bieverknad
I Sogn og Fjordane er det kring 600 bikubar, medan det er bruk for 3000 til pollinering. Difor ønskjer Heiberg fleire fulltidsbirøktarar. Entusiastiske Neven som sjølv er birøktar i 50%, bidreg i PolliVest med å kurse nye birøktarar saman med Sogn Jord- og Hagebruksskule. Han har stor tru på framtida.
– Min spådom er at om ti år er birøkt til pollinering like naturleg som å bruke kunstgjødsel og vatning i dag. Slik er det alt i andre land, som til dømes USA.