Flaumråka kommunar får nær 90 millionar

– Vi har bestemt at Aurland får 12,5 og Lærdal nesten seks millionar i ein første fase, for å raskt kunne kome i gang med opprydding, og utgifter i krisesituasjonen dei var i, seier kommunalminister Jan Tore Sanner (H).

I Hordaland får Odda 52 millionar kroner til akutte tiltak, Voss får litt over 13 millionar kroner og Kvam får 2,6 millionar. Den samla utbetalinga er på 86 millionar kroner. Odda og Voss har søkt om nær det doble av det dei fekk tildelt. Pengane skal vere utbetalte før jul.

Ordførar i Aurland er glad for den tidlege julegåva frå regjeringa.

– Det er kjempekjekt. No får vi dekka arbeidet vi har gjort i akuttfasen og noko vidare, så det kjem godt med, seier Noralv Distad (H).

Enorme øydeleggingar

Då flaumen herja i oktober, vart Aurland, Lærdal, Odda og Voss spesielt hardt råka. Hus flaut nedover elvane, vegar og bruer forsvann og mange hundre personar måtte evakuerast frå heimane sine. Nokre må framleis bu andre stader medan dei ventar på at husa kan byggast opp att.

Den kommunale infrastrukturen fekk også merke vasskreftene som var i sving. Berre i Aurland kommune reknar ein med at det vart gjort skade for 130 millionar kroner. Som ei første hjelp i den akutte fasen er det likevel berre bedt om kring 13 statlege millionar i hjelp.

• Les også: Erna Solberg lovar pengar til flaumråka kommunar raskt

Reknar med å dele ut meir pengar

Ordførarane i dei råka kommunane har etterlyst at pengane måtte kome raskt på plass, og Sanner er glad for å kunne innfri dette ynsket. Han trur også at det vil kome krav og ynskje om meir pengar, og det er Sanner budd på å dele ut.

– I denne omgang blir det utbetalt om lag 90 millionar kroner, men vi veit at kostnadane til gjenoppbygging av kommunal infrastruktur blir høgare. Vi veit at desse kommunane vil kome tilbake når dei har fått betre oversikt over kostnaden, og då vil vi vurdere det i tråd med retningslinjene våre, avsluttar Sanner.

Over 1000 eigedommar vart råka av uvêret, og forsikringsselskapa vil betale ut kring 400 millionar kroner i erstatning. Også NVE har spelt inn at dei treng 211 millionar kroner ekstra for å gjennomføre krise- og hastetiltak.

• Les også: NVE treng 211 millionar til flaumsikring

– Eg syns regjeringa har levert godt til no. Det er mykje som står att, men eg føler vi spelar godt på lag med statlege styresmakter, seier Aurlandsordføraren.