Det var dette Stryn Energi vakna opp til måndag for ei veke sidan. Selskapet reknar med at flaumen og toreveret i Indre Nordfjord vil koste selskapet rundt tre millionar kroner.
– Dette vil heilt klart slå negativt ut på botnlinja for oss, seier nettsjef Hans Ørjasæter.
Kostnadane kjem både av direkte skadar på materiell, arbeidet med å bygge nytt linjenett og erstatning til kundar for tap av straum.
Svært dårleg tidspunkt
Uveret råka samtidig som store delar av mannskapet var ute i ferie.
– Det skjedde på verst tenkjeleg tidspunkt, seier Ørjasæter.
Tilsette vart kalla tilbake frå ferie og mannskap frå Sogn og Fjordane Energi og BKK kom til for å hjelpe. Ørjasæter skryt av mannskapet som stod på natt og dag for å få straumen tilbake til dei som var råka.
Trass i at alle har fått straumen tilbake, står det att mykje arbeid. I Utvik ligg det kablar på bakken, stolpar er vaska vekk og nytt linjenett må på plass. Dagens straumforsyning er berre midlertidig.
NETTSJEF: Hans Ørjasæter i Stryn Energi.
Foto: Asgeir Heimdal Reksnes / NRKProvisoriske løysingar
Stryn Energi reknar med det vil koste om lag ein million kroner å få på plass ei permanent forsyning til den hardt råka bygda.
– Vi har nok ein månads arbeid føre oss i Utvik, før alt er på plass, seier arbeidsleiar Magnar Breidablikk.
Selskapet har enno ikkje oversikt over kva forsikringa dekkjer, og kva som blir reine tap for Stryn Energi.
– Men berre erstatningar til kundar for bortfall av straum vil truleg kome opp i ein million kroner, seier Breidablikk.
Dette dekker ikkje forsikringar.
