Frå 1. januar 2019 er det Torghatten Nord som overtek drifta, det har Vegdirektoratet no avgjort.
Tilbodet frå Torghatten var ein milliard kroner billegare enn tilbodet frå Fjord1.
– Vi har vore kjend med at det var stor prisavstand mellom dei ulike tilbydarane, så vi har forventa at ei slik innstilling ville kome, seier administrerande direktør i Fjord1, André Høyset.
- Les også:
Avdramatiserer
Halhjem-Sandvikvåg er det tredje største ferjesambandet i Norge. Fjord1 har nærare 70 tilsette på sambandet, som selskapet har drive dei siste ti åra. Men Høyset vil avdramatisere kva verknadar dette får for Fjord1.
– Det er eitt av dei større sambanda vi har i vår portefølje. Denne kontrakten bind opp stor kapital, så denne kapitalen kan vi no frigjere til å kjempe om nye kontraktar, seier han.
Får fleire avgongar
Men Fjord1 er likevel ikkje letta over at denne kontrakten glapp.
– Sjølvsagt ikkje. Vi ønskte å halde fram der, men samtidig er det mange samband som kjem ut på anbod no, så no har vi musklar til å kjempe om nye kontraktar, seier Høyset.
Med det nye anbodet vil ferjesambandet få hyppigare avgongar. Medan Fjord 1 har tre ferjer på strekninga Halhjem-Sandvikvåg i dag, skal Torghatten ha fire ferjer det første året, og fem ferjer frå januar 2020.
Dermed blir det avgang kvart 25. minutt frå kvar side i 2019, og avgang kvart 20. minutt frå 1. januar 2020. I dag har Fjord 1 ferjeavgang kvart 30. minutt.