Sogndølene kom seg til hektene att etter tap i serieopninga for Selje, medan Florø snudde siger i serieopninga til tap i cupen.
Snudde kampen
Fjøra vann oppgjeret med 3-1, men det var gjestene frå kystbyen som opna best. Bruntrøyene var utan Sigurd Hjorthol, Espen Gabrielsen, Christer Husa og sentrale John-Felipe Holmgren, men tok likevel leiinga ved Tor Henning Brandsøy etter 18. minutt.
Resultatet stod seg i seks minutt. Johan Salveson scora to mål før kvilen og sytte med det for 2-1 leiing til vertane ved pause.
Vann 3-1
Andre omgang var berre 11 minuttar gamal då Vegard Ruud auka til 3-1.
Dermed vart Fjøra det første laget i fylket som kvalifiserte seg for andre kvalifiseringsrunde då dei tysdag kveld vann 3-1 over Florø.
Drama i Årdal
I Årdal var det nærme å bli reprise frå cupkampen for to år sidan. Då gjekk oppgjeret mellom Årdal og Stryn til straffekonkurranse. Den gangen trekte Årdal det lengste strået, men i år var det stryningane som tok seg vidare.
Det stod 2-2 ved ordinær tid. Frank Hool og Kåre Balsnes gav stryningane leiinga to gonger, men Preben Strypet sytte for balanse i målprotokollen med sine to første mål etter overgangen frå Kaupanger. I andre ekstraomgang sette inn Balsnes og Rune Myklebust inn dei avgjerande scoringane.