Fiskeglade tyskarar sviktar ikkje

Framleis er det flest nordmenn som brukar ferien på fisking, men tyskarane ligg hakk i hæl. Det fortel reiselivsselskapa langs kysten.

Forskjellen på fisketurisme og anna turisme, er at turistane ofte vender tilbake.

• LES OGSÅ: Færre norske til Briksdalsbreen
• LES OGSÅ: Trur likevel på ein fantastisk sesong
• LES OGSÅ: Turistane svikar musea

– Avslapping

Dei tyske ektepara Lehmann og Friédenberger er blant fleire tyskarar som stadig vel å komme tilbake til den norske kysten for å fiske.

(Artikkelen held fram under biletet)

I tre veker skal dei fiske frå morgon til kveld på havet utanfor Staveneset i Askvoll, der dei har vore kvart einaste år sidan 2005 og 2007.

– Fisking er avslapping. Og sjå kor vakkert det er her. Ingen folk, berre natur, seier Petra Friédenberger og Sylvia Lehmann.

– Og fisk?

– Og fisk, håpar eg.

Og at dei kjem tilbake neste år, det er det ingen tvil om.

– Åja, neste år, året etter der igjen og så vidare, seier dei tyske turistane.

• LES OGSÅ: Juni vart rekordmånad
• LES OGSÅ: Krisa påverkar ikkje hotella

Jamn fisketurisme

Tyskarane på Staveneset er langt ifrå dei einaste som tek turen til den norske kysten for å fiske. Reiselivsselskapa kan fortelje om ei turistnæring som held stand.

– Det har vore godt besøk, men nokre melder om at det har vore ganske stabilt, ikkje så ulikt fjoråret. Men eg ser at det har vore bra med fisk, noko som er bra for turistane, seier Wenny Irene Hansen, dagleg leiar i Visit Fjordkysten AS.

Framleis er det nordmenn som toppar fisketurismen langs fylkeskysten, men tyskarane er ein god nummer to.

(Artikkelen held fram under biletet)

Hansen registrerer også at det vert fleire spontanbesøk.

– Det er ei ny utvikling som er veldig positiv, seier Hansen.

Kjem stadig tilbake

Ifølgje ho er det svært vanleg å sjå at tyske fisketuristar vender tilbake.

– Viss ein ser på ein tradisjonell tysk fisketurisme, så er det ofte at dei kjem fleire gonger. Ofte kanskje allereie i mars på guttetur, med kameratar for å fiske. Og så kjem dei kanskje igjen litt seinare på året med familien sin om dei trivst godt. Og så kanskje ein tredje gong i september om dei har moglegheit til det, seier Hansen.

• LES OGSÅ: Bremuseum set seg høge mål
• LES OGSÅ: Reiselivsselskap tapar store pengar

For samarbeidsbedriftene til Reisemål Stryn & Nordfjord har det også vore ein jamn sesong for fisketurismen.

– Det er det vi har fått tilbakemeldingar om. I forhold til fiske så er det sjølvsagt mest tyskarar slik det brukar å vere, og nokre russarar har begynt å vise interesse for fiske, seier produktsjef Ann-Helen Blakset.