Fire medaljar og to norske rekordar

Meisterskapen vart avvikla i Alta.

• SJÅ: Fullstendig resultatliste

- Det gjekk heilt supert. Det vart medalje på alle våre løftarar som var med, jublar junioren Tor Emil Gjøringbø.

Norske rekordar

I tillegg til medaljene, sette junioren Kim Andre Blikås og ungdomsløftaren Lars Andreas Bruland nye norske rekordar.

Bruland, som vann 82,5 kilos-klassa med totalt 646,5 kilo, sette ny norsk rekord med 246,5 kilo i markløft. I tillegg fekk han opp 155 kilo i benkpress og 245 kilo i knebøy. Bruland vann med nær 100 kilo meir enn sølvvinnar Erik Fredriksen.

(ARTIKKELEN HELD FRAM UNDER BILETET)

- Heilt rå

Blikås vart nummer to i 100 kilos-klassa med totalt 781 kilo. Rekordløftet kom i benkpress med 216 kilo. Det var også tredje beste resultat i benkpress for løftaren som er heilt i vasskorpa med tanke på landslagsdeltaking. Blikås løfta 47 kilo mindre enn sigrande Stian Walgermo Møllevik (Sjøholt).

- Han er berre heilt rå. Men det vart spanande. Først sette ein Møllevik norsk rekord med 215,5 kilo, før Kim Andre tok opp 216 kilo, fortel Gjøringbø. I tillegg løfta Blikås 285 i bøy og 280 kilo i mark

Glippa med teknikken

Junioren Lars Marius Storevik enda på tredjeplass blant seks deltakarar i klassa 90 kilo. Med 195 kg (kne), 145 kg (benk) og 230 kg (markløft), enda han til slutt med 570 kilo. Alle dei godkjende løfta var personlege rekordar.

- Lars Marius var uheldig. Han sleit litt med teknikken og fekk ikkje godkjent benk og kne før i siste forsøk. Dermed fekk han ikkje gå så høgt som han ville, fortel Gjøringbø.

Persa med 35 kilo

Gjøringbø var sjølv berre 2,5 kilo bak gullet i si klasse, 110 kilo junior. Med resultata 245 kg (kne), 200 kg (benk) og 240 kg (mark), vart det totalt 685 kilo. Alle personlege rekordar.

- Til saman persa eg meg med 35 kilo, seier han.

Også Roger Navarsete deltok i meisterskapen. Junioren som konkurrerte i 82,5 kilos-klassa vart nummer tre med totalt 580 kilo. Sogndølen løfta 210 i knebøy, 180 i benkpress og 190 kilo i markløft.