Film om bestefar blei beste film

Hopp til innhold

– Eg er svært tilfreds med dei 3 prisane seier mestvinnande Håvard Bergo frå Eksingedalen i Vaksdal kommune.

Bergo vann prisen for beste film og beste dokumentar med den poetiske filmen ”Helge Bergo -Takk for turen". Vi følgjer den 91 år gamle bestefaren på sin daglege gåtur, og på ein strabasiøs tur opp til stølen.

Håvard Bergo som har utvikla seg gjennom filming på ekstremsportveko på Voss og fjellsportfestivalen i Sogndal vann også prisen for beste sportsfilm med longboard-filmen ”Sway”.

– Deltakinga på Sogndal Filmfestival er ein stor inspirasjon for meg seier Bergo.

Gjennom nettsidene til NRK Sogn og Fjordane har lesarane og sjåarane dei siste vekene vore med og røysta fram vinnaren av publikumsprisen under filmfestivalen i Sogndal. Heile 2748 stemmer kom inn, og i denne kategorien var det Dagny Sunde sin film "Fryktfaktor" som stakk av med prisen!

– Vi vart kjempeoverraska. Dei andre filmane var så bra og proffe, så detta var ikkje venta, seier Dagny Sunde til NRK.

Filmen deira handlar om frykta for å ikkje er gjort leksene og er laga i skuletida. Med ein pris på 8000 kroner i fotoutstyr lovar jentegjengen at det fort vert fleire filmar.

– Det er røysterekord for festivalen som ikkje har vore over 2000 nettrøyster tidlegare. Det er me veldig godt nøgde med, seier festivalsjef Sunniva Lerum Hollekve.

Prisutdelinga skjedde tradisjonen tru med raud løpar og gallafest i Sogndal kulturhus torsdag kveld.