NRK har i dag fått fleire meldingar om at SMS-varslinga til Widerøe har fungert tidvis lite tilfredsstillande for dei mange passasjerane som skulle vore ute og flydd med selskapet i dag.
Fekk SMS på bussen
– Eg fekk vite om streiken då eg kom på Gardermoen i dag tidleg. Eg klarte då å rekke ekspressbussen. Først fire timar etter at flyet skulle letta, medan eg var på bussen, kom SMS frå Widerøe, fortel Karoline Vie frå Vassenden i Jølster.
Som kring 11.000 andre passasjerar måtte ho i dag nøye med seg med anna transport enn fly for å kome seg fram. Streiken blant dei kabintilsette i Widerøe har sett samtlege Widerøe-fly på bakken.
- LES OGSÅ:
- LES OGSÅ:
Widerøe beklagar
Kommunikasjonsdirektør i Widerøe, Richard Kongsteien, var onsdag kveld ikkje kjend med problem med SMS-varslinga til passasjerane.
– Men vi beklagar sjølvsagt på det sterkaste at det har skjedd. Når så mange tusen passasjerar skal ha beskjed, så kan det ha oppstått nokre problem undervegs, seier Kongsteien.
- LES OGSÅ:
- LES OGSÅ:
Skulle vore travelt
Han reknar likevel med at dei aller fleste passasjerane som skulle vore med Widerøe sine flygingar i dag hadde fått med seg at det var ein streik under oppsegling.
– Vi har brukt alle tilgjengelege kanalar for å gjere dette kjend, seier Kongsteien og legg til at det ikkje har vore kontakt mellom partane i streiken i dag.
– Vi vonar jo at denne konflikten snart er over. I dag skulle ha vore ein svært travel trafikkdag for Widerøe, seier kommunikasjonsdirektøren.
Blei forbanna
Karoline Vie meiner uansett at Widerøe burde klart å få sendt ut varsling til passasjerane på SMS.
– Eg må innrømme at eg blei ganske forbanna då meldinga kom på telefonen min, fem timar etter at flyet skulle ha letta frå Gardermoen, seier Vie, som i kveld kom fram til Sogn og Fjordane med ekspressbussen.
Sjokkert over streiken
Richard Kongsteien i Widerøe brukte krasse ord om sine eigne kabintilsette i ei pressemelding tidlegare i dag.
– Eg er sjokkert over at vi er i streik. Dei best betalte kabintilsette i Europa streikar og det er heilt uforståeleg for oss, seier Kongsteien som meiner at selskapet har tilbydd eit oppgjer sikrar gode vilkår og pensjonsrettar for dei tilsette.
Leiar i Widerøes kabinforening, Kari Onarheim, seier til Aftenposten at dei vil stå på krava og at dei ikkje kan godta at dei er den einaste kabinforeninga i SAS-konsernet som ikkje kan forhandle om sin eigen pensjon.