NRK Meny
Normal

No går begge ferjene - men du må likevel bu deg på ein times ventetid

Det er rydda opp i forskalingsmaterialane som stengde ferjekaien på Lavik i føremiddag. Begge ferjene som trafikkerer sambandet går no som normalt, men du må rekne med opp mot ein times ventetid.

Lang kø på Oppedal

LANG KØ: Slik ser det ut på Oppedal ferjekai klokka 15.00.

Foto: Geir Bjarte Hjetland / NRK

– Dei har klart å rydde i forskalingsmaterialane som låg framfor kaien, og ferja går frå Lavik i 12-tida, seier vakthavande ved Vegtrafikksentralen i Sogn og Fjordane, Jan Erikstad.

Klokka 14.45 melder fleire reisande om lange køar, spesielt på Oppedal-sida.

– Eg ser at Fjord1 melder om opp mot ein times ventetid på sine sider, stadfestar Erikstad.

Lang kø på Oppedal

LANG LANG REKKJE: Klokka 14.45 nådde køen på Oppedal-sida heilt hit.

Foto: Erlend Blaalid Oldeide / NRK

Ferjesambandet vart stengt i 1030-tida på grunn av at forskalingsmaterialar hadde losna og hamna i Sognefjorden. Materialane låg slik til at ferja MS «Lifjord», som hadde ein ekspressbuss og fleire tyngre køyretøy om bord, ikkje klarte å leggje til kai.

Det pågår stort byggjearbeid på ferjekaien i Lavik i samband med oppgraderingar av ferjesambandet mellom Lavik og Oppedal. Det er forskalingsmaterialar som vert nytta i dette arbeidet som losna i dag tidleg, truleg av vêr og vind.

– Så vidt eg veit klarte dei å fjerne materialane ved hjelp av ein krane og ein jarnbom, seier Erikstad.

Måtte liggje og vente

MS «Lifjord» vart på grunn av oppryddingsarbeidet liggjande eit godt stykke frå kaien, i påvente av at oppryddinga skulle bli ferdig.

– Eg kan ikkje seie nøyaktig kor mykje som ligg og flyt i fjorden, for vi kan ikkje gå nært nok til at vi kan telje. Vi har varsla entreprenøren NCC, så får vi sjå kva som skjer, seier mannskap i styrehuset på ferja.

Ferja var langt frå full, men hadde ein ekspressbuss om bord, i tillegg til ein del tyngre køyretøy.

– Vi hadde 30 passasjerar om bord. Dei hadde det fint her, men dei ville jo sjølvsagt til land. Men vi måtte berre vente, seier mannskapet.

(Artikkelen held fram under biletet)

Materialar i hamnebassenget ved Lavik ferjekai

MYKJE MATERIALAR: Det var mange lause plankar som lå og flaut ved Lavik ferjekai og førte til at ferja ikkje kune leggje til.

Foto: NRK-tipsar

Vinden lagar problem

I tillegg til at MS «Lifjord» ikkje kom seg til kai i føremiddag, hadde sambandet ytterlegare problem å stri med.

– Dei hadde problem med ei ferje på grunn av vinden, og ei stund var det berre ei ferje som gjekk. Men no går begge som normalt, seier Erikstad ved Vegtrafikksentralen.

Stor auke i bedriftar som tilbyr opplevingar til turistar
Fotballfeber i Florø før tidenes første fjerderundekamp i cupen
veger, arbeid med reparering etter flommen, hotell, gjestehus, parkeringsplasser med busser, busser