Ferja mellom Dragsvik- Hella – Vangsnes i Sogn køyrde på land etter å ha fått tekniske problem. Ferjesambandet var i morgontimane innstilt ein periode, men no er den eine ferja sett inn slik at det er trafikk på ferjesambandet.
Det var firda.no som først skreiv om saka.
– Ferja MF Lærdal fekk tekniske problem på veg inn til ferjekaia på Dragsvik og dermed køyrde den på land. Men den hadde heldigvis liten fart då det skjedde, seier regionsjef i Fjord1, Tor Kristoffersen.
På GRUNN: Ferja måtte ha hjelp for å komme seg laus frå fjæresteinane.
Foto: NRK-tipsarFerja dreiv på land, men trass i at farten var låg måtte ho få hjelp til å komme seg laus.
– Vi måtte få den andre ferja på sambandet til å dra den laus, og det tok litt tid.
To passasjerar og fem mannskap
No blir det jobba med å få på plass ei ekstra ferje i sambandet. Det var to passasjerar om bord og eit mannskap på fem.
– Eg trur det gjekk bra med alle. Det var ikkje noko dramatikk rundt grunnstøytinga, seier Kristoffersen.
Ferja ligg til kai i Dragsvik og Fjord1 jobbar også med å få kartlagt skadane på ferja.
– Vi må ha dykkar på plass for å få oversikt over skaden på undersida av ferja. Så må vi få på plass ei ferje til i sambandet. Det ligg ei reserveferje i området som er tilgjengeleg berre vi får på plass mannskap.
