Indre Sunnfjord spelemannslag kom på andreplass i landskappleiken. Tidlegare har dei vunne kring ti gonger, men måtte i år sjå seg slått av Voss. – Vossingane er svært flinke, så det er ikkje noko nederlag, seier Sigmund Eikås, som er leiar for Indre Sunnfjord Spelemannslag.
Frøholm rykker opp
Britt Pernille Frøholm frå Hornindal spelemannslag vann 'spel hardingfele klasse B', og har med det kvalifisert seg til A-klassen, som er eliteserien på kappleiken.
Lagspel hardingfele junior vart vunne av 'Gamlebanken' i Førde frå Indre Sunnfjord spelemannslag. Ingrid Schei Stuhaug frå Naustedalen Spelemannslag tok andreplassen i juniorklassen for spel på hardingfele.
Gode danseresultat
Audun Sølvberg frå spelemannslaget Fjelljom og Arngunn Timenes Bell frå Gaular spelemannslag klatra til topps i 'dans fele klasse B'.
Kappleiken viser at det står godt til med rekrutteringa her i fylket når det gjeld dans. I 'dans hardingfele klasse C' – som er klassa for dei under 18 år – strauk dansepar frå fylket avgarde med dei fire fyrste plassane.
Rune S. Støfring og Marie A. Heieren frå Indre Sunnfjord spelemannslag dansa seg til topps i klassen med ein parhalling.
Også veteranane gjorde det godt på dansegolvet; 'Dans hardingfele klasse D' vart vunne av Kjell Berge og Bjørg N. Berge Sogn spel- og dansarlag.