Hopp til innhold

Fekk teltstang i hovudet - og frontruta knust av LS-stormen

Ole Martin Erdal (20) fekk ei teltstong rett i hovudet slik at han tok til å blø, då uvêret tok laust under Landsskyttarstemnet i Oppdal i dag. Frontruta på bilen til familien fekk også hard medfart.

Ole Martin Erdal

KNUST: Ole Martin Erdal kom greitt ifrå stormen. Det gjorde ikkje frontruta på bilen.

Foto: Jørn Njøs / NRK

– Det var heftige tilstandar, seier Ole Martin Erdal (20), som er frå Førde, og er saman med familien sin på Landskyttarstemnet på Oppdal.

Han var akkurat ferdig med feltskytinga, og hadde nett komme heim til campingvogna, då uvêret slo til.

– Det bles opp kraftig, så vi hengde oss i teltstengene for å få forteltet ned, men før vi rakk det, bles det av garde, seier Erdal.

Han heldt i den eine teltstonga, men vinden var så sterk at han mista grepet. Dermed for heile teltet til himmels. Men det som går opp, må også komme ned.
Og det gjorde det til gangs. Midt i hovudet på Ole Martin.

– Den kom ganske hardt ned, ja. Eg tok til å blø naseblod, og kjende det godt i hovudet. Eg har nokre kular og litt hevelse, men det går etter forholda bra, seier Erdal.

Såg campingvogner bli kasta rundt

Også mora hans fekk nokre delar i hovudet, men kom greitt ifrå hendinga.

Han har aldri opplevd maken.

– Det var ganske rått. Det var fleire campingvogner som vart kasta rundt og hamna på taket og på sida. Det var enorme krefter i sving, seier Erdal.

Trass i dramatikken, rakk han aldri å bli redd.

– Men eg merka at det var mykje krefter i sving. Når forteltet er stort, så er det lite ein kan gjere. Men eg var aldri redd, sjølv om det kunne gått gale, når ein tenkjer på det i etterkant, seier Erdal.

(Artikkelen held fram under biletet)

Velta campingvogn

KAST I KAST: Denne campingvogna skal ha vorte kasta rundt fleire gonger av vinden, før ho landa på sida.

Foto: Stein Mortensbakke / NRK

Smadra frontruta på bilen

Også bilen til familien fekk hard medfart. Frontruta er heilt knust etter samanstøyten med eit flygande objekt.

Og forteltet til familien er historie, for å seie det pent.

– Vi prøvde febrilsk å halde det fast, men det ville seg ikkje slik, seier Erdal.

Sjølve vogna har også fått ein medfart, men ikkje av alvorleg grad.

Telt på halv åtte

PÅ HALV ÅTTE: Dette teltet hamna høgt oppe i eit tre.

Foto: NRK-tipsar

– Det er mest skjønnheitsmessig. Det er forteltet som er kaputt, det er heilt rivna og teltstengene er kaputt. Det er berre å kaste, seier Erdal.

Fekk fullført feltskytinga

Men familien har ikkje planar om å reise heim.

– Vi satsar på bra vêr dei neste dagane. Vi er no vestlendingar, så vi må no tole litt, seier Erdal.

Både han og søstera Karoline har skote felt i dag, og begge vart ferdige med skytinga, før stemnet vart avblåst.

– Eg er nøgd med at eg kom igjennom, seier Erdal.

Ole Martin skaut 27 på feltskytinga.

– Eg er ikkje heilt nøgd, det vart litt mykje vind på det eine haldet, men resten av skytinga var bra, seier Erdal.

Søstera Karoline skaut 28 av 30, og er også greitt nøgd.

– Når ein tenkjer på forholda, så er det ikkje så verst, seier Erdal.

Pappa Ole Herman skal skyte måndag og onsdag.