Fekk 18-årspresangen tre dagar på forskot

– Det kom heilt overraskande, og det er heilt uverkeleg. Men veldig kjekt, seier Hope, som går for Hyen IL.

Onsdag fyller han 18 år, men presangen har han allereie fått.

– Det var ikkje mykje som mangla på at det vart bursdagspresang, nei, ler Hope.

For det er ikkje kvardagskost at 18-åringar får bli med i troppen til U23VM.

– Det er først og fremst 19- og 20-åringane dei prioriterer. Så eg er veldig nøgd med å få lov til å delta som 18-åring, seier Hope.

• Les også: Tefre knuste alle i tradisjonsrikt renn

Ikkje lett å komme utanom

Det stadfestar administrasjonssjef i Sogn og Fjordane skikrins, Yngve Thorsen.

– Dette er ein fantastisk sterk prestasjon. Eg trur nok Skiforbundet har sett spesielt på resultata han leverte i Norgescupen i helga der han var totalt suveren på klassiskdistansen i 18-årsklassen. I tillegg slår han dei beste 19- og 20-åringane. Då er det vanskeleg å komme utanom ein slik løpar, seier Thorsen.

Normalt sett tek Skiforbundet ut utøvarar i aldersklassen 19 og 20.

– Det er yttarst sjeldan at dei tek ut 18-åringar, seier Thorsen.

Isande kulde førte til at Hope berre fekk gått klassisk under Norgescupen, då løpet i fristil vart avlyst. Men i klassiskløpet klinte han til og slo den beste 18/19-åringen med eitt minutt og to sekund.

Og Hope hadde suverent beste tid uansett klasse og slo bestemann i klasse 19/20 med 23 sekund. I tillegg gjekk han inn til sølv i junior-NM sprint fredag.

– Det var moro å få fullklaff, seier Hope, som har satsa på ski sidan han var 13 år, og som no går på Norges Toppidrettsgymnas på Geilo. Han er også aktiv i friidrett.

Viktig for rekrutteringa

Tidlegare har han hatt fristil som favorittøving, men i den seinare tid har han jobba mykje med teknikken i klassisk og er jamngod i begge. Planen fram mot VM er klar.

– No skal eg trene godt i ei veke, og så byrje å toppe forma fram mot klassisk-distansen som eg skal gå først, seier Hope.

Thorsen peikar på at slike prestasjonar er viktige for rekrutteringa til langrennssporten.

– Det er viktig at dei unge løparane ser at det stadig kjem gode langrennsløparar frå Sogn og Fjordane, og at det er mogleg å komme herifrå og matche dei aller beste. At vi har slike rollemodellar som Hope, Torstein Bu, Gjøran Tefre og Andreas Hetle er avgjerande for arbeidet vårt, seier Thorsen.