Normal

Får stor bot etter fotballsjikane

Medan Sogndal-keeperen låg skadd på bakken, kasta fotballsupporterar ting på bana. No må Vålerenga betale 25 000 kroner i bot.

Kenneth Udjus

LÅG NEDE MED SKADE: Medan Kenneth Udjus låg på bakken, kasta Vålerenga-supporterar snusboks og lighter på bana.

Foto: Arne Stubhaug / NRK

Hendinga skjedde under ein fotballkamp på Ullevaal stadion i april. Norges Fotballforbund har no gitt heimeklubben Vålerenga bot for måten supporterane oppførte seg på.

Dei kasta ein boks med snus og ein lighter på bana medan Sogndal-keeper Kenneth Udjus låg nede.

Skjerpande forhold

Doms- og sanksjonsutvalet i NFF skriv at både allmennpreventive og individualpreventive omsyn gjer til at forholdet må sanksjonerast.

Dei legg i skjerpande retning vekt på at handlinga var retta mot ein spelar som låg nede med skade. Vålerenga har også tidlegare fått bøter for upassande oppførsel mellom Vålerenga-fansen.

Men Oslo-klubben får skryt for måten dei handterte saka på i etterkant og for at dei vil jobbe for å unngå liknande episodar i framtida.

Bot også til Rosenborg

Også Rosenborg har fått bot etter ein seriekamp mot Lillestrøm i april. RBK-supporterane avfyrte minst to bluss i denne kampen, noko som er forbode. For dette får trønderklubben 30 000 kroner i bot.

Vegopning på Bergum i Førde kommune