Får statsministeren på kaffibesøk

Nordeide og dottera måtte springe for livet då store jord- og steinmassar kom veltande mot huset deira i Sandvika andre juledag.

I kveld kjem statsministeren for å høyre den dramatiske historia.

– Eg er stolt for å seie det rett ut, seier Nordeide.

Såg raset kome

Orkan og store nedbørsmengder sette sitt preg på Vestlandet i romjula. Både vindkreftene til «Dagmar» første juledag og det påfølgjande kraftige regnet gjorde store skader.

Fleire kommunar vart utan straum og telefondekning. På eitt tidspunkt vurderte fylkesmannen å sende ordonnans, eller offisielt sendebod, for å nå kommunar ein ikkje hadde fått kontakt med.

Situasjonen var dramatisk også for innbyggjarane i Sandvika i Høyanger.

(Artikkelen held fram under TV-saka)

– Vi høyrde lyden i fjellsida og berre sprang på dør. Eg såg raset oppe i elva. Det var slike mengder og fart, fortel Nordeide om den dramatiske kvelden.

Gav etter for press

Sjølv om Nordeide har fått flytta heim att og skadane i ferd med å bli utbetra, vil Statsminister Jens Stoltenberg få sjå skadane i grenda.

Statsministeren takka først nei til invitasjonen frå banksjef Arve Sandal i Sparebanken Sogn og Fjordane, men snudde etter massivt medietrykk.

HØYR:

• LES OGSÅ: Banksjef etterlyser landsfaderen Jens

Når Stoltenberg landar på Haukåsen i ettermiddag, blir han den tredje frå regjeringa som vitjar fylket etter stormen. Kommunalminister Liv Signe Navarsete og samferdsleminister Magnhild Meltveit Kleppa har allereie vitja fleire kommunar i Nordfjord.

• LES OGSÅ: Varslar full oppvask etter uvêret

(Artikkelen held fram under TV-saka)

– Ikkje bra i krisetider

I Leikanger vil statsministeren møte representantar frå fleire stormråka kommunar, samt representantar frå Sogn og Fjordane, Hordaland og Møre og Romsdal fylkeskommunar. Også fleire statlege tilsyn deltek på møtet.

Deretter går turen vidare til Høyanger der ordførar Petter Sortland har funne fram nokre velvalde ord.

• LES OGSÅ: – Statsministeren bør bruke tid på folket

– Det går litt på dette med beredskap, korleis naudetatar fungerer. Det er ikkje sikkert at all sentralisering er god service for innbyggjarane i krisetider, seier Sortland.

– Tok på strak arm

Skadane etter uveret er på fleire hundre millionar kroner. Berre i Høyanger reknar Sortland med at det er gjort skade for over to millionar kroner på veg, kommunale bygg og eigedom. Han vil be statsministeren auke potten til Naturskadefondet.

Før Stoltenberg reiser vidare til Førde og retur til tigerstaden, skal han innom Nordeide i Sandvika.

– Eg er ikkje den personen som likar å ha så store ting på gang, men det der tok eg på strak arm, seier Nordeide.