Regjeringa får krass kritikk for hemmeleghald i E39-saka

Fleire politikarar er kraftig provoserte over hemmeleghaldet. Ein av dei er fylkesleiar Trude Brosvik i Kristeleg Folkeparti.

• LES OGSÅ: Samferdsleministeren nektar å offentleggjere den faglege innstillinga i E39-saka

– Saka verkar meir og meir underleg. Samferdsleminister Ketil Solvik-Olsen er nesten ikkje på banen. Når det så er statsministeren som uttaler seg om saka så tyder det på at dette er ei partipolitisk avgjerd.

• LES OGSÅ: Regjeringa har bestemt seg - her skal E39 gå gjennom Nordfjord

Trass at dei fleste rapportar har peika på at midtre line gjennom Gloppen og Eid ville vere den beste stamvegløysinga i Nordfjord, valde Regjeringa likevel å gå for indre line. Brosvik reagerer på at vi ikkje får vite grunnlaget

– Når ein ikkje får vite innstillinga frå departementet og fagstatsråden så synest eg det er veldig spesielt.

Hemmeleghald og spekulasjonar

Regjeringa har i lengre tid enn venta på å avgjere kvar E39 skal gå gjennom Nordfjord. Dette har ført til til spekulasjonar om intern usemje i Regjeringa, og om statsminister Erna Solberg overprøvde samferdselsminister Ketil Solvik-Olsen då ho offentleggjorde indre line via Stryn.

– For det første meiner eg at ein ikkje skal høyre på rykte. Eg kjem aldri til å kommentere dette. Regjeringa har fatta ei avgjerd og det er ingen som kjem til å ta dissens, seier Statsminister Erna Solberg

Vil ikkje offentleggjere

Spekulasjonane har ikkje vorte mindre etter at samferdselsministeren nektar å offentleggjere den faglege innstillinga si. Statssekretær Jon Georg Dale held fast på at innstillinga frå Solvik Olsen ikkje vil bli offentleggjort, og avviser at det har vore intern usemje i regjeringa.

– Det ser ikkje vi behov for sidan det først og fremst er interne saksdokument At det no går rykte om usemje i regjeringa kan vi avkrefte. Det er inga usemje i regjeringa om det valet som er tatt.

– Men det hadde vore veldig enkelt for deg å avkrefte ei eventuell usemje i regjeringa ved å leggje fram Solvik Olsen si innstilling. Men du nektar å leggje fram innstillinga. Er ikkje det litt merkeleg?

– Nei, det er ikkje merkeleg at regjeringa forheld seg til vanlege saksprosedyrer. Interne saksdokument er interne saksdokument.

Oppgitt ordførar

Sentarparti-ordførar Anders Ryssdal i Gloppen er oppgitt.

– Det burde kome fram kva som var den opphavlege tilrådinga frå Solvik Olsen. Det har noko med tilliten til dei styrande å gjere.

Sint på eiga Regjering

Tore Hjelle, nestleiar i Eid Høgre, er fortvilt over si eiga Regjering.

– Det Regjeringa har gjort i denne saka er veldig provoserande. Det er heilt tydleg at det er gjort eit vedtak som går på tvers av dei faglege tilrådingane. Elles hadde det ikkje vore noko problem å offentleggjere Solvik Olsen si innstilling, seier han.

Opprørte partileiarar

KrF-leiar Knut Arild Hareiede er opprørt.

– Eg vil ikkje seie at eg er overraska om det har vore splitting intern i regjeringa. Men dertil meir uhøyrt er det dersom statsministeren har overprøvd sin eigen fagstatsråd på ei så viktig samferdslesak. Også Venstre-leiar Trine Skei Grande meiner det er ille dersom Solvik Olsen er overprøvd.

• LES OGSÅ: Kritikk mot E39-val

Brosvik på si side meiner at regjeringa har noko å skjule sidan dei nektar å offentleggjere Solvik Olsen si innstilling.

– I ei så viktig sak som kvar du legg E39, og når du vel å sjå vekk frå dei faglege tilrådingane, vel ein heilt annan argumentasjon for fylket i midten, enn det regjeringa har brukt i Hordaland og Møre og Romsdal. Då har folk krav på å få vite kvifor