Årdal får kritikk etter trippeldrapet

Det skriv Fylkeslegen i Sogn og Fjordane i sin konklusjon i tilsynssaka som vart oppretta mot kommunen.

Fylkeslege Per Stensland finn likevel ikkje grunnlag for å kople mangelfullt helsetilbod til det tragiske trippeldrapet om bord i Valdressekspressen 4. november i fjor, skriv Sogn Avis.

– Vi har gått igjennom legejournalen og sett på tilbodet som asylsøkjaren har fått. Ut frå ei heilskapeleg vurdering har vi ingen grunnlag til å kople desse to tinga saman, seier Stensland til NRK.no.

• LES OGSÅ: Fylkesmannen opnar tilsynssak etter trippeldrapa
• LES OGSÅ: Skuffa over tidspunktet fylkesmannen valde å varsle tilsynssak etter trippeldrapet

Styrkja ikkje helsetenesta

Ein asylsøkjar som var busett på mottak i Øvre Årdal sit varetektsfengsla sikta for drapet på bussjåføren og to medpassasjerar om bord i Valdrekseksressen.

Kort tid etter drapa varsla Fylkeslegen i Sogn og Fjordane at dei starta tilsynssak mot kommunen si helseteneste.

Ifølgje Sogn Avis går det av avgjerda i tilsynssaka fram at det ikkje var fagleg forsvarleg at kommunen ikkje styrka helse- og omsorgstenesta då det vart oppretta eit nytt asylmottak sommaren 2013.

Måtte sjølv be om legesjekk

Kommunen får også kritikk for å berre å ha tilbode legetenester viss asylsøkjarane sjølve følte behov for dette. Kommunen gav ikkje aktivt tilbod om helseundersøking.

– Dette er ikkje i konflikt med minstekravet i regelverket, men vi meiner at den spesielle situasjonen, med så mange som kjem frå eit konfliktområde i verda, må kunne ventast å bere med seg potensielle traumar. Då ville det vere god praksis å kunne tilby aktivt tilbod om helseundersøking, seier Stensland til NRK.no.

– Kor krass er kritikken mot Årdal kommune?

– Vi peikar på at det ikkje var fagleg forsvarleg då dei i ein situasjon med knapp bemanning på legesida lot vere å forsterke helse- og omsorgstenesta.

– Ser på saka

Rådmann i Årdal, Frank Westad, seier til NRK.no at kommunen no går igjennom skrivet frå fylkeslegen og at dei skal sende skriftleg tilbakemelding over helga.

Dei ynskjer difor ikkje å kommentere saka på noverande tidspunkt.

Årdal-ordførar Arild Ingar Lægreid har tidlegare uttalt til NRK at han var skuffa over at Fylkeslegen valde å opprette tilsynssak mot kommunen etter trippeldrapet.

– Avsluttar tilsynssaka

Fylkeslegen seier saka no blir avslutta frå deira side.

– Vår vurdering er ei avgjerd om å ikkje gå vidare med den i tilsynssamanheng, seier Stensland.

Ein kopi av saka blir likevel sendt Helsedirektoratet ettersom han meiner at det kan vere grunnlag for å gjere seg tankar kring etableringsprosessen av slike mottak.