- Eg er lei meg for at det er Gilde i Sogndal som er kjelda til E.coli-smitten. Samstundes er eg letta over at saka er oppklart, seier kommunikasjonsdirektør Nina Sundquist i Gilde til NRK Sogn og Fjordane.
Kjøtet kjem frå Førde
Kjøtet som vert brukt i spekepølsa frå Gilde sitt dotterselskap Terina i Sogndal kjem frå slakteriet i Førde.
- Noko kjem også fra slakteriet på Tynset, men ikkje noko av råstoffet stammar frå slakteriet på Rudshøgda, seier Sundquist.
Driftssjef Jacob Sætre ved Gilde Vest sitt slakteri i Førde seier dei avventar situasjonen. Han har ikkje fått beskjed om å setje i verk ekstraordinære tiltak som følgje av at anlegget leverer kjøt til Terina.
Sikre i si sak
På ein pressekonferanse onsdag ettermiddag opplyste Mattilsynet at den farlege E.coli-bakterien, no er funnen i to uopna pakkar med Gilde Birkebeiner Sognemorr. Spekepølsa er produsert ved fabrikken i Sogndal. Det er førebels ikkje gjort funn på dei andre to pølsetypane.
- Vi er sikre på at dette er smittekjelda. Den er no påvist i Sognemorr, men bakterien finst truleg også i Gilde Birkebeiner Fjellmorr og Gilde Haugpølse, seier Preben Aavitsland, avdelingsdirektør i Folkehelseinstituttet, til VG Nett.
Fabrikken framleis stengd
Sidan måndag har Mattilsynet hatt mistanke om at spekepølse herifrå er årsaka til E.coli-utbrotet. Måndagen vart fleire tonn med Gilde Birkebeiner Sognemorr, Gilde Birkebeiner Fjellmorr og Haugpølse trekte tilbake frå butikkane. Same dagen vart produksjonen stoppa slik at fabrikken kan vaskast og desinfiserast.
- Når fabrikken kan opne igjen er heilt avhengig av analyseresultata, seier distriktssjef i Mattilsynet i Indre Sogn, Merete Lunde, til NRK Sogn og Fjordane.
- Ingen spekepølse i butikkane
Omsetningsforbodet av dei tre typane spekepølse vert oppretthalde inntil vidare, opplyser Mattilsynet.
14 born har dei siste vekene vorte sjuke av den farlege bakterien. Eitt av borna døydde.