– Vi sat i hagen og hadde ein idyllisk og fredeleg kveld. Så la vi merke til piggsvinet som tusla rundt i busken og sat og såg på det ei stund, seier Stine Marie Jonstad.
Saman med vennegjengen skulle ho nyte midtsommarnatta i hagen i Holmedal. Dei vart plutseleg vitne til ei noko spesiell kamp på liv og død. Piggsvinet skulle snart vise seg å ikkje vere så søtt og uskuldig som dei først trudde.
– Plutseleg kom ein frosk og piggsvinet gjekk frå å vere søtt til å bli ein killingmachine, fortel Stine Marie Jonstad.
SVOLTEN: Piggsvinet fekk aldri has på frosken.
Foto: NRK-tipsarJonstad tok opp kamera og filma kampen mellom piggsvinet og frosken.
– Dei heldt på i seks-sju minutt. Det var ein brutal kamp. Synd eg ikkje hadde lyd på filmen. Eg skjønnar no kvifor piggsvinet har svin i namnet for det kom nokon voldsame gryntelydar frå det. Frå frosken kom det knaselydar. Det var ganske ekkelt.
Det heile enda med at piggsvinet gav opp.
– Piggsvinet stakk til skogs, medan frosken hoppa vidare. Det såg ikkje ut som om den hadde så store skadar, seier Jonstad.
